ललितपुरका सबै स्थानीय तहलाई बचत संघको सहयोग

काठमाडौं  : ललितपुर जिल्ला बचत तथा ऋण सहकारी संघले स्थानीय तहलाई सहयोग गरेको छ ।

ललितपुरका सबै (६ वटा) स्थानीय तहलाई आर्थिक सहयोग गर्ने निर्णय संघले आईतबार गरेको थियो । सोही क्रममा सोमबार (आज) ललितपुर महानगरपालिकालाई एक लाख रुपैयाँ सहयोग गरेको हो । ललितपुर महानगरपालिका मेयर चिरिबाबु मर्हजनलाई संघ अध्यक्ष रामहरि बजगाईंले एक लाख रुपैयाँको चेक हस्तान्तरण गर्नुभयो ।

संघले महानगरपालिकालाई १ लाख, नगरपालिकालाई ७५ हजार र गाउँपालिकालाई ४० हजार रुपैयाँ सहयोग गर्ने निर्णय गरेको थियो । संघले सामुदायिक विकास कोषमा जम्मा भएको रकमबाट स्थानीय तहलाई सहयोग गरेको संघका अध्यक्ष रामहरि बजगाईंले जानकारी दिनुभयो ।

कोरोना भाईरस रोकथाम, उपचार तथा राहत वितरणमा केही हद सम्म भएपनि सहयोग पुगोस् भनेर सहयोग गरेको अध्यक्ष बजगाईंले बताउनुभयो ।

संघले सहयोग हस्तान्तरणको लागि गोदावरी नगरपालिका, महालक्ष्मी नगरपालिका, कोन्ज्योसोङ गाउँपालिका, बाग्मती गाउँपालिका र महांकाल गाउँपालिकाको लागि पनि चेक र पत्र काटिसकेको छ । समय अनुकुल मिलाएर हस्तान्तरण गरिने संघले जनाएको छ ।