लकडाउनमा सहकारीको योगदानको उच्च मुल्यांकन, विवरण उपलब्ध गराउन महासंघको आग्रह

काठमाडौं, ५ बैशाख

राष्ट्रिय सहकारी महासंघले कोरोना भाइरस (कोभिड १९) को महामारीका कारण देशभर लकडाउन भएको समयमा सहकारी संघ/संस्थाले गरेको योगदानको उच्च मुल्यांकन गरेको छ ।

महासंघको काठमाडौं उपत्यकामा उपलब्ध संचालक समितिको शुक्रबार पुल्चोकस्थित महासंघको सभाहलमा भएको छलफलले सहकारी अभियानले यो विषम परिस्थितिमा गरेका कार्यको व्यवस्थित रुपमा डाटा संकलन गर्न निर्णय गर्दै सहकारी संघ+संस्थालाई आफूले गरेको कार्यको विवरण महासंघका उपलब्ध गराउन आग्रह गर्ने समेत निर्णय गरेको छ ।

महासंघका अध्यक्ष मिनराज कँडेलको अध्यक्षतामा भएको छलफलमा कोभिड १९को महामारीको समयमा सहकारीे क्षेत्रले गरेको सेवाको विषय सहित यसको असर र यसले सिर्जना गर्ने समस्या र चुनौतीका विषयमा समेत छलफल भएको थियो । छलफलले महासंघले कृषि, उपभोक्ता तथा अन्य उत्पादक सहकारी तथा वित्तिय कारोबार गर्ने सहकारीहरुले पु¥याइरहेको सेवा, यी संस्थाहरुमा पर्ने असर र चुनौती र त्यसको समाधानका विषयमा सम्बन्धित क्षेत्रका सहकारीकर्मीहरुसँग छलफल गरी भावी योजना तयार गर्ने पुनः महासंघमा छलफल गर्ने निर्णय गरेको छ ।

छलफलमा महासंघका वरिष्ठ उपाध्यक्ष तथा अन्तर्राष्ट्रिय सहकारी महासंघका ग्लोबल बोर्ड सदस्य ओमदेवी मल्ल, संचालकहरु केवी उप्रेती, खेम पाठक, डिवी बस्नेत, टेकप्रसाद चौलागाई, राजेन्द्र पौडेल र महाप्रबन्धक चित्राकुमारी थाम्सुहाङ सुब्बाको उपस्थिति थियो ।