बैंकले नियमित निक्षेपको मात्रै कारोबार गर्ने, सहकारी संस्था भने महासंघको धारणा कुर्दै

काठमाडौं, ८ चैत

सरकारले कोरोनाको प्रकोपबाट जोगिन सावधानी अपनाउन अपिल गरेपछि अत्यावश्यक सेवा बाहेकका सबै क्षेत्र बन्द हुने भएका छन् ।

बैंक तथा वित्तीय संस्थामा ब्याक अफिसमा बसेर काम गर्ने कर्मचारीलाई बिदा दिने व्यवस्था मिलाई दिन बैंकरहरुले आग्रह गरेका छन् । नियमित निक्षेपको कारोबार बाहेक अन्य बैंकिङ गतिविधि रोकिने भएको छ। त्यसो हुँदा नोटका लागि मात्र खासखास शाखा खोल्दा हुने बैंकरले सुझाब बैंकले दिएका छन् ।

तर वित्तीय क्षेत्रमा ठुलो हिस्सा बोकेको सहकारी क्षेत्रमा भने अन्यौलता देखिएको छ । सहकारी संस्थाहरुले दिने सेवालाई कसरी प्रवाह गर्ने भन्ने विषयमा अन्यौलता छाएको छ । प्रारम्भिक सहकारी संस्थाका सचालक र कर्मचारी त्रसित छन् । सहकारी क्षेत्रको सर्वोच्च निकाय सहकारी महासंघले यस विषयमा आधिकारिक धारणा अहिलेसम्म सार्वजनिक गरेको छैन ।

सहकारी संस्था बन्द नै गर्न नहुने बताईए पनि कसरी सुरक्षित तरिकाले सेवा दिने भन्ने विषयमा सहकारी अभियानको धारणा आएको छैन । यस हिसाबले सहकारी संस्थाहरु महासंघको धारणाको पर्खाइमा रहेका छन् ।

सहकारीले कति बजेसम्म सेवा दिने, कारोबारलाई कसरी व्यवस्थित बनाउने, कर्जा प्रवाह लगायतकोृ विषयमा महासंघको आधिकारिक धारणा आवश्यक रहेको एक सहकारीकर्मीले बताउनुभयो । यस्तो अवस्थामा भएको बचत बाहिरिने र नयाँ निक्षेप वा बचत आउँदैन ।