झापा जिल्ला सहकारीको अपिल : सेवा प्रवाह गर्दा उच्च सर्तकता अपनाउनु

बिर्तामोड, ८ चैत

जिल्ला सहकारी संघ, झापाले कोरोना भाईरसको संक्रमणबाट जोगिन र बच्ने उपायका बारेमा उच्च सर्तकता अपनाउन सहकारी संस्थाहरुलाई आब्हान गरेको छ । कोरोना भाईरसका बारेमा जिल्ला संघले सहकारी संस्थाहरुका लागि शनिबार १७ बुँदे अपिल जारी गरेको अध्यक्ष गणेश ढकालले जानकारी दिनुभयो ।

बिहान १० बजेपछि सहकारी संस्था खोल्न र ४ बजेसम्म बन्द गरिसक्न संघले अपिल जारी गरेको उहाँले बताउनुभयो । त्यसतै दिउँसो २ः३० बजेसम्म मात्र आर्थिक कारोबार गर्न समेत अपिल जारी गरेको छ ।

लघुवित्त सेवा प्रदाय सहकारी संस्थाले केन्द्र व्यवस्थापन गरि १० बजेपछिको तालिका बनाई केन्द्र प्रमुखमार्फत केन्द्रित संकलनको माध्यमबाट कारोबार गर्न समेत अनुरोध गरेको छ । त्यस्तै बचत फिर्ता लिन आउँदा एक पटकमा एक जना र एक व्यक्तिलाई हप्तामा दुईपटक बचत फिर्ता दिने व्यवस्था मिलाउन भनेको छ । अत्यावश्यक बाहेक अन्य कामका लागि बचत फिर्ता नलिन सदस्यलाई अनुरोध गर्न र संस्थाको अवस्था अनुसार बचत फिर्ताको सिमा निर्धारण गर्न संघको आग्रह रहेको छ ।

संस्थामा नियमित हात धुने व्यवस्था मिलाउन, बजार प्रतिनिधिलाई माक्स, सेनिटाइजर र हेण्ड ग्लोबसहितको व्यवस्था गर्न समेत अनुरोध गरेको छ ।

जिल्ला संघले जारी गरेको अपिल सबै सहकारी संस्था पालना गर्नुपर्ने शिखर बचत तथा ऋण सहकारी संस्था, बिर्तामोडका अध्यक्ष दीपेन्द्र राउतले बताउनु भयो । कोरोना भाईरसको संक्रमणबाट जोगिन सबैले उच्च सर्तकता अपनाउनु पर्ने उहाँको भनाई छ । विपत्तको समयमा सहकारी संस्था बन्द नगरि सेवा दिनुपर्ने उहाँको तर्क छ ।

सेवा प्रवाह गर्दा उच्च सर्तकता भने अनिवार्य रुपमा अपनाउनुपर्ने उहाँ बताउनुहुन्छ । शिखर साकोसले नगद कारोबारभन्दा पनि डिजिटल कारोबारलाई जोड दिएको अध्यक्ष राउतले बताउनुभयो । संस्थाका सदस्य, सञ्चालक समिति, लेखा समिति र कर्मचारीलाई कारोना बारे जनचेतना समेत विभिन्न माध्यमबाट फैलाउँदै आएको उहाँको भनाई छ ।