सहकारी बैंकले सुरु गर्यो एटिएम सेवा

काठमाडौं, ४ पुस ।

राष्ट्रिय सहकारी बैंकले कृषि विकास बैंकसँगको सहकार्यमा सञ्चालन गर्न लागेको एटिएम सेवाको शुभारम्भ भएको छ । बैंकको बिहीबार सम्पन्न १६ औं साधारणसभामा अर्थमन्त्री युवराज खतिवडाले एटिएम सेवाको शुभारम्भ गरेको हो ।

एटिएम सेवा राष्ट्रिय सहकारी बैंकले आफ्ना सदस्य सहकारी संस्थामार्फत देशभरका सहकारीका सदस्यहरुले उपभोग गर्न पाउने गरी एटिएम सेवा उपलब्ध गराएको हो ।

देशभरका सहकारीका सदस्यहरुले सुलभ रुपमा सुरक्षित कार्ड प्रयोग गर्न सक्ने छ । बैंकले सहकारी संस्थाहरुमा प्रविधिको प्रयोग गरी सहकारीका सदस्यहरुलाई समेत नबीनतम सुविधा उपभोगको अबसर प्रदान गर्ने लक्ष्य सहित एटिएम सेवा सुरु गरेको हो ।

सहकारी बैंकका सदस्य सहकारी संघ संस्थाहरुले बैंकका शाखा कार्यालय मार्फत तोकिएको प्रक्रिया पूरा गरेर आफ्ना सदस्यहरुलाई एटिएम कार्ड प्रदान गर्न सक्नेछन् ।

यूनियन पे इन्टरनेशनलको आधुनिक चिप तथा पिन सहितको सुरक्षित कार्ड देशभर जूनसुकै स्थानमा प्रयोग गर्न सकिन्छ ।