पोखराको जनएकता सहकारी चोरी गर्ने नगदसहित तीन जना पक्राउ

कास्की, १० असोज । पोखरा महानगरपालिका–८ सिर्जनाचोकमा रहेको जन एकता सहकारी संस्था लिमिडेटबाट चोरी गरेको अभियोगमा बुधबार ३ जनालाई प्रहरीले पक्राउ गरेको छ ।

पक्राउ पर्नेहरुमा पोखरा महानगरपालिका–१५ रामबजार बस्ने २० वर्षीया अन्जली गुरुङ, पोखरा महानगरपालिका–७ एयरपोर्ट बस्ने २२ वर्षीया बिनिता गुरुङ र सोही महानगरपालिका–६ गौरीघाट बस्ने १८ वर्षीय कमल ठगुन्ना रहेका छन् ।

उक्त सहकारी संस्थाबाट भदौ ३१ गते नगद ९ लाख १४ हजार रुपैयाँ चोरी भएको थियो । सोही घटनामा संलग्न फरार अभियुक्तहरुको खोजी गर्ने क्रममा घटनामा संलग्न उनीहरुलाई पोखरा महानगरपालिका–६ बुलौदीबाट फेला पारी प्रहरीले पक्राउ गरेको हो । प्रहरीले उनीहरुको साथबाट ५ लाख ३८ हजार ८० रुपैयाँ बरामद गरेको छ । यस सम्बन्धमा प्रहरीले आवश्यक अनुसन्धान गरिरहेको छ ।