सहकारीको कार्यक्षेत्र एक जिल्ला मात्र !

काठमाडौं । अब बचत तथा ऋणको कारोबार गर्ने सहकारीको कार्यक्षेत्र एक जिल्ला मात्र हुने भएको छ । सरकारले ल्याउन लागेको ‘सहकारी ऐन २०७२’ मा सहकारीको कार्यक्षेत्र एक जिल्ला मात्र हुने व्यवस्था छ ।

हाल सहकारीको कार्यक्षेत्र नेपालभर समेत रहेका छन् । सहकारीमा वित्तिय अपराध बढेकाले सहकारीलाई बढीमा एक जिल्लामा मात्र सिमित गराउन लागिएको हो । ऐन प्रारम्भ हुँदाका बखत एक जिल्लाभन्दा बढी कार्यक्षेत्र राखी कारोबार गर्ने गरी सञ्चालन भएका संस्थाले तोकिए बमोजिमको आधार र अवधिभित्र आफ्नो कार्यक्षेत्र एक जिल्लामा सीमित गर्नु पर्ने व्यवस्था ऐनमा छ । केन्द्रीय विषयगत व्यवसायिक सहकारी संघ वा राष्ट्रिय सहकारी महासंघ वा बैंङ्कको कार्यक्षेत्र भने नेपालभर रहने ऐनमा व्यवस्था छ ।

‘बमोजिम सम्बन्धित संस्थाले तोकिएको समयभित्र कार्यक्षेत्र सीमित नगरेमा कार्यालय प्रमुखले त्यस्तो संस्थाको कार्यक्षेत्र एक जिल्लाभित्र सीमित रहने गरी तोक्नु पर्नेछ ।’ नयाँ ऐनमा भनिएको छ, ‘एक जिल्लामा संस्थाको कार्यक्षेत्र सीमित गर्दा एक भन्दा बढी जिल्लामा रहेको सस्ंथाको शाखा कार्यालय वा सेवा केन्द्रको हिसाब फरफारक गरी त्यस्तो शाखा कार्यालय बन्द गर्ने वा सम्बन्धित जिल्लामा नै यस ऐन बमोजिम संस्था दर्ता गरी स्थानीयकरण गर्नु पर्नेछ ।’

कृषि तथा वनजन्य उत्पादन, प्रशोधन, भण्डारण तथा बजारीकरण, विद्युत उत्पादन, प्रसारण तथा वितरण, स्वास्थ्य, शिक्षा वा पर्यटन लगायतका सेवा सम्बन्धी सहकारी व्यवसाय एक जिल्लाभन्दा बढी कार्यक्षेत्रमा सञ्चालन गर्न सकिने ऐनमा उल्लेख छ ।