सञ्चालक समितिले कार्यकारी भूमिका निर्वाह गर्नु हुँदैन : घिमिरे

निजगढ । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) का अध्यक्ष ऋषिराज घिमिरेले सहकारी एकीकरणको भावनासहितको कानून आवश्यक रहेको बताएका छन् ।

बाराको निजगढमा सञ्चालित मध्यतराईस्तरीय सहकारी युनिफिकेशन र एकीकरण गोष्ठिको उदघाटन गर्दै उक्त घिमिरेले सहकारी २०४८ को ऐनले अहिलेको अवस्थालाई नियमन गर्न नसक्ने बताए ।

सहकारीमा नीतिगत निर्णय र कार्यान्वयन गर्ने निकाय एउटै हुन नसक्ने पनि घिमिरेले बताए । सञ्चालक समितिले कार्यकारी भूमिका निर्वाह गर्नुहुदैन उनले भने, कार्यान्वयनका लागि व्यवस्थापनलाई जिम्मेवार बनाउन सकेमात्र संस्थागत सुशासन कायम हुन्छ ।

कार्यक्रममा नेफ्स्कूनका सञ्चालक कृष्ण पौडेलले सहकारीहरु सामाजिक व्यवसाय भएकोले यसलाई समुदायमा आधारित र सदस्यकेन्द्रीत बनाउन जरुरी रहेको बताए । सहकारीलाई सुशासित, अनुशासित र जोखिमरहित बनाउन सबै सहकारीकर्मीहरु जिम्मेवार हुनुपर्ने पौडेलले बताए ।

कार्यपत्र प्रस्तुत गर्दै नेफ्स्कूनका बरिष्ठ अधिकृत सञ्जय तिमल्सेनाले नेफ्स्कून दीगो र सफल बचत तथा ऋण सहकारी निर्माणका लागि देशव्यापी रुपमा अभियान सिर्जना गरिरहेको बताए ।

कार्यक्रममा मध्यतराईका सात जिल्लाका २०० सहकारीकर्मीहरुको सहभागिता रहेको थियो ।