विकू बचतमा २ सहकारी गाभिए, २ अरब कुल पूँजी पुर्याउने लक्ष्य

नवलपरासी । विकू बचत तथा ऋण सहकारी संस्था लिमिटेडमा दुईवटा सहकारी गाभिएका छन् । श्री गणेश बचत तथा ऋण सहकारी संस्था र दाजु–बहिनी बचत तथा ऋण सहकारी संस्था विकू सहकारीमा गाभिएका हुन् ।

विकू बचतका अध्यक्ष हरिलाल सापकोटाको अध्यक्षतामा यहि पौष ४ गते सम्पन्न भएको साधारण सभाले यस्तो निर्णय गरेको हो भने यस अघिनै श्री गणेश र दाजु–बहिनी बचतको साधारण सभाले गाभिने निणर्य गरिसकेका छन् । एकिकरण पछि संस्थाको कुल पूँजी करिब १ अरब ५२ करोड र सदस्य संख्या २२ हजार पुग्ने साधारण सभामा जानकारी गराइएको छ ।

गैडाकोट ८ मा २५ बर्ष अगाडि ५० पैसावाट सुरु गरिएको विकू बचत तथा ऋण सहकारी संस्थाले यस आर्थिक बर्षमा करिव साँढे ४ करोड नाफा आर्जन गरेको छ । गैडाकोटको विजय सामुदायिक शिक्षा सदनको प्राङगणमा भएको २६ औं साधारणसभा तथा रजतमहोत्सवमा कोषाध्यक्ष कालिदास गौडेलले आगामी बर्ष साँढे ६ करोड नाफा आर्जन गर्ने आर्थिक प्रतिवेदन प्रस्तुत गरे । विकुको सम्पति सवा अर्ब पुगेको पनि उनले बताए ।

प्रगती प्रतिवेदन प्रस्तुत गर्दै सचिव वीरभद्र सापकोटाले २० हजार सेयर सदस्य पुगेको जानकारी दिदै आगामी बर्ष २५ हजार सेयर सदस्य पुर्याउने वताए । कार्यक्रममा बोल्दै प्रमुख अतिथि नेपाल राष्ट्र बैङकका गभर्नर डा चिरन्जिवी नेपालले सहकारीले बचत गर्ने बानीको विकास गरि वित्तिय कारोबारमा सर्वसाधारणको आकर्षण बढाएकोमा खुसी व्यक्त गरे । बचत संगै आफ्नो रकम कहाँ कसरी परिचालन हुन्छ र सहकारीमा आयव्यय के कती छ जानकारी लिईराख्न सेयर सदस्यहरुलाई आग्रह गरे ।

यस्तै रजत महोत्सवका अवसर निकालिएको विकू रजत ग्रन्थ पनि आजै विमोचन गरिएको छ । रजत महोत्सवको अवसरमा विकूले विभिन्न व्यक्ती तथा संस्थाहरुलाई सम्मान गरेको छ । संस्थाले बर्ष कर्मचारीको रुपमा रामप्रसाद भुषाल र विवश न्यौपानेलाई तथा बर्ष सञ्चालकको रुपमा गोविन्द रिमाललाई सम्मान गरेको छ । संस्थालाई सहयोग गर्ने ५ दर्जन संघसंस्था तथा ब्यक्तिलाई पनिसम्मान गरिएको विकु बचत तथा ऋण सहकारी संस्थाका प्रमुख अधिकृत माधव प्रसाद पौडेलले जानकारी दिए ।

रजत महोत्सवका अवसरमा विकुले आफ्नो सेवाका बारेमा जानकारी दिन कृषी उत्पादन, हस्तकला खेलौना तथा सजावटका सामाग्रीको स्टल हरु प्रदर्शनीमा राखेको थियो । २०४८ सालमा दैनिक पचास पैसा संकलन गरि सुरु गरिएको विकुले यस आर्थिक वर्षमा कुल पुजिँ २ अरब पुर्याउने लक्ष्य लिएका छ ।