सहकारी मन्त्रीलाई अभिनन्दन थाप्नै भ्याई नभ्याई !

बागलुङ । सहकारी तथा गरिबी निवारण मन्त्री चित्रबहादुर केसीलाई बागलुङमा अभिनन्दन गरिएको छ । जन्मस्थान जिल्लाको गलकोटमा आयोजित विशेष समारोहमा शनिबार उप प्रधानमन्त्री समेत रहेका केसीलाई अभिनन्दन गरिएको हो । उनी प्रधानाध्यापक भई सेवा गरेको तत्कालीन गलकोट माध्यमिक विद्यालय (अहिलेको गलकोट उच्च मावि)ले केसीको सम्मानमा अभिनन्दन समारोह गरेको थियो ।

सो अवसरमा उच्च माविका अध्यक्ष गुमानसिंह भण्डारी, प्राचार्य देवेन्द्र खत्रीलगायतले उपप्रधानमन्त्री केसीलाई अभिनन्दन गरेका थिए । कार्यक्रममा सहभागी शिक्षक, प्राध्यापक, सामाजिक अगुवा, शिक्षाप्रेमीलगायत सर्वसाधारणले समेत केसीलाई बधाई तथा शुभकामना दिएका थिए । उपप्रम केसीले गलकोट माध्यमिक विद्यालय हुँदा २०२५ सालमा प्रधानाध्यापक भई सेवा गरेका थिए ।

गलकोटको मल्ममा जन्मी नेपाली राजनीतिको शीर्ष स्थानमा पुगेका केसीलाई यस क्षेत्रमा शैक्षिक जागरण फैलाउने व्यक्तिको श्रेय पनि दिने गरिएको छ । उनी लामो समयसम्म शिक्षण पेसामा संलग्न थिए । केसी उपप्रम हुनु जिल्लाकै गौरवको विषय भएकाले उनको सम्मानमा अभिनन्दन समारोह राखिएको उच्च माविका प्राचार्य देवेन्द्र खत्रीले बताए ।