श्रोत परिचालन साकोसको अध्यक्षमा प्रदिप अधिकारी, १७ लाख ९९ हजार नाफा कमाउन सफल

धादिङ । धादिङबेशी स्थित श्रोत परिचालन बचत तथा ऋण सहकारी संस्था (श्रोत परिचालन साकोस)को १८ औं साधारणसभाले प्रदिप अधिकारीको अध्यक्षमा नयाँ कार्यसमिति निर्वाचित गरेको छ ।

शनिबार भएको साधारणसभा तथा अधिवेशनले अधिकारीको अध्यक्षतामा १३ सदस्यीय नयाँ कार्यसमिति सर्वसम्मत रुपमा चयन गरेको हो । संस्थाको पुरुष उपाध्यक्षमा नारायणकुमार श्रेष्ठ र महिला उपाध्यक्षमा अम्बिाका अधिकारी चयन भएका छन् । त्यस्तै सचिवमा कविता थापा, कोषाध्यक्षमा रुद्र बहादुर खत्री, सहसचिवमा रामहरी अधिकारी रहेका छन् ।

त्यस्तै बालकुमार श्रेष्ठको संयोजकत्वमा ३ सदस्यीय लेखा समिति समेत चयन गरिएको छ । समितिको सदस्यहरुमा मदन श्रेष्ठ र सोमनाथ नेपाल रहेका छन् ।

संस्थाको गत आर्थिक वर्षमा शेयर पूँजी ६९ लाख २९ हजार ६ सय भएकोमा आ.व. २०७१/२०७२ मा ३१ लाख ४८ हजारमा वृद्धि भई कुल १ करोड ७७ हजार ६ सय पुगेको छ ।

१ हजार ३ सय ३५ जना शेयर सदस्य र ४ सय २ जना बालबचत कर्ता भएको संस्थाको कुल आम्दानी १ करोड २५ लाख ६९ हजार २ सय २४ रहेको छ । त्यस्तै कुल खर्च १ करोड ३ लाख १९ हजार ४ सय ७३ र कुल बचत २२ लाख ४९ हजार २ सय ५७ रहेकोमा १७ लाख ९९ हजार ७ सय नाफा हुन पुगेको छ ।