बढ्दै छ सहकारीको कारोबार

झापा । जिल्लमामा सञ्चालित सहकारी संस्थाले सात अर्बभन्दा बढी रुपैयाँ बचत गर्न सफल भएका छन् ।

जिल्लामा रहेका ८५४ वटा सहकारी संस्थाले सात अर्ब ३९ करोड ७४ लाख बचत गरेका छन् । १२ अर्ब ६२ करोड ९२ लाख परिचालित पुँजी ती संस्थामा रहेको जनाउँदै एक अर्ब ८७ करोड ८४ लाख सेयर पुँजी, एक अर्ब १९ करोड ५६ लाख कोष र नाफामात्रै ३० करोड ५६ लाख ८० हजार गर्न सहकारी सफल भएका डिभिजन सहकारी संस्था झापाका प्रमुख माधवप्रसाद पोखरेलले जानकारी दिए ।

नौ अर्ब २९ करोड ९० लाख सहकारीमा आबद्ध सदस्यका लागि ऋण लगानी गरिएको छ । सहकारी संस्थाले आव २०७१/७२ मा राज्यलाई आफूले गरेको साँढे ३० करोड नाफाबाट दुई करोड २३ लाख ९९ हजार रुपैयाँ कर तिरेको समेत डिभिजन सहकारी कार्यालयले जनाएको छ ।

जिल्लामा बहुउद्देश्यीय सहकारी संस्था १३२ वटा र बचत तथा ऋण सहकारी संस्था २८९ वटा रहेका छन् । त्यस्तै ३१७ वटा कृषि सहकारी संस्था मध्ये १३६ वटा महिलाद्वारामात्र सञ्चालित सहकारी संस्था रहेका छन् ।