१० वटा दुग्ध सहकारीलाई मिल्क एनालाइजर मेसिन वितरण

इलाम । दूधको शुद्धता र गुणस्तर मापन गर्दै तत्काल दूधको मूल्य थाहा पाउन सहज होस् भन्ने उद्देश्यले दुग्ध वितरण आयोजना विराटनगरले गत वर्ष १० वटा दुग्ध सहकारी संस्थालाई मिल्क एनालाइजर मेसिन वितरण गरेको छ ।

आयोजनाले एक लाख अनुदानमा संस्थालाई उक्त मेसिन वितरण गरेको हो । दूधमा भएको हावा, पानी र एसएनएफलगायतको मात्रा तत्कालै थाहा पाउन र दूधको गुणस्तरअनुसार किसानलाई आफ्नो दूधको मूल्य थाहा पाउन सजिलो होस् भनेर सो मेसिन वितरण गरेको हो ।

आयोजनाले शान्तिडाँडाको पैरेभञ्ज्याङ, वाफरुङ, पुवाखोला, जनहित, साँखेजुङको नेपालटार, सूर्याेदय नगरपालिकाको तीनघरे, जनजीवन, लक्ष्मीपुरको बर्दु, हरियाली र आमबोटे दुग्ध उत्पादक सहकारी संस्थालाई एनलाइजर मेसिन वितरण गरेको आयोजनाका निमित्त प्रमुख उमेशलाल कर्णले जानकारी दिए ।

यसअघि पनि आयोजनाले पूर्वाञ्चलका १० वटा चिस्यान केन्द्र र २३ वटा दुग्ध सहकारी संस्थालाई एनालाइजर मेसिन वितरण गरेको थियो । एनालाइजर वितरणसँगै सहकारी संस्थामा आबद्ध ७१ जनालाई यसको प्रयोगबारेमा तालिमसमेत दिइएको कर्णले बताए । जिल्लाका आठ वटा दुग्ध चिस्यान केन्द्रमार्फत सङ्कलित दूध संस्थानले खरिद गर्ने गरेको छ । ती केन्द्रमा करिब ३० वटाभन्दा बढी दुग्ध उत्पादक सहकारी संस्थाले दूध ढुवानी गरिरहेका छन् ।

दुग्ध उत्पादक सहकारी संस्थाका पदाधिकारीका अनुसार परम्परागत रुपमा दूधको गुणस्तर परीक्षण गर्दा समय लाग्ने र वास्तविक मूल्य पनि किसानलाई थाहा नहुने अवस्थामा मिल्क एनालाइजर जस्तो आधुनिक मेसिनले तत्काल मूल्य थाहा पाउँदा किसान र सहकारी दुवैलाई फाइदा हुने भट्टराई पशुपालन तथा कृषि सहकारी संस्था सुलुबुङकी अध्यक्ष लीलादेवी भट्टराईले बताइन ।