सहकारीले गाडी खरिद गर्दा ५ प्रतिशत मात्रै भन्सार

काठमाडौं । सरकारले बाह्य मुलुकबाट गाडी खरिद गरेर नेपाल ल्याउँदा लाग्ने पाँच प्रतिशत भन्सार महसुल आजबाट लागू गरेको छ ।

अर्थमन्त्री डा.रामशरण महतले यो वर्षको बजेटमा सवारी भन्सार घटाएको उल्लेख गरेका थिए । सार्वजनिक यातायात सञ्चालन गर्नेगरी दर्ता भएका सहकारी तथा कम्पनीको हकमा मात्र यो व्यवस्था लागू गरिएको हो ।

सहकारी तथा कम्पनीले आयात गर्ने ४० र सोभन्दा बढी सिट क्षमता भएका सवारी साधनको आयातमा पाँच प्रतिशत मात्र भन्सार महसुल लिई अन्तःशुल्क र सडक मर्मत तथा सुधार दस्तुर छुट दिने व्यवस्था बजेटमा गरिएको छ ।

यसरी पैठारी गरेका सवारीहरु दस वर्ष नपुगी बिक्री वितरण, नामसारी वा हक हस्तान्तरण गर्न नपाइने भन्सार विभागले जनाएको छ । यदी त्यसो गरेमा कानुन बमोजिम पुरै महसुल बुझाउनुपर्र्ने समेत विभागले जनाएको छ ।