जनमिलन सहकारी चोरी गर्ने तीन अभियुक्त पक्राउ

काठमाडौं । भूकम्पको मौका छोपी सामाखुशी चोकमा संचालित जनमिलन सहकारी संस्थाबाट नगद सात लाख एक सय ७० रुपैंया र सुनका विभिन्न गरगहना अन्दाजी ४३ तोला भएको सेफ समेत चोरी गर्ने तीन जना अभियुक्त पक्राउ परेका छन् ।

उनीहरुले गत बैशाख १३ गते चोरी गरेका थिए । पक्राउ पर्नेमा नुवाकोट, ९ भाल्चे स्थाई ठेगाना भई हाल सामाखुशी बस्ने मेक लाल तामाङ्ग, काठमाडौं टोखा ४ झोरका सुनिल तामाङ्ग र नवलपरासी प्रगतीनगर ९, कुनाघाट स्थाई गर भई हाल सामाखुशी बस्ने वाहुन भन्ने मनिराज काफ्ले रहेको महानगरीय अपराध महाशाखा टेकुले जनाएको छ । चोरीएको सेफ टोखा २ शिवपुरी जङगलमा लगी सेफ भित्र रहेको धनमाल लिई फोडिएको सेफ वौडेपानी मुहानको दहमा लुकाई राखेको अवस्थामा महानगरीय अपराध महाशाखाले बरामद गरेको हो ।

साथै उक्त घटनामा संलग्न सुनिल तामाङ्ग यस अघिनै अपराध महाशाखाले पक्राउ गरी अवैध हातहतियार तथा खरखजाना मुद्धामा अनुसन्धान भईराखेको र अर्का अभियुक्त वाहुन भन्ने मनिराज काफ्ले ज्यान मार्ने उघोग तथा हातहातियार खरखजाना मुद्धामा चितवनमा पक्राउ भईअनुसन्धान भई रहेको प्रहरीले जनाएको छ ।

घटनाको थप अनुसन्धान तथा फरार रहेका अभियुक्तको खोजी कार्य जारी रहेको महाशाखाबाट जारी गरेको विज्ञप्तिमा भनिएको छ ।