रजिष्ट्रार ज्यू ! सडक सहकारी केन्द्रीय संघ चाहियो, दर्ता गरी पाउँ !

– खिला दाहाल / रजिष्ट्रार ज्यू ! हामीलाई केन्द्रीय संघ चाहियो । काम गर्ने, नगर्ने पत्तो छैन । लक्ष्य थाहा छैन । अनुभव र योग्यता मिलाम्ला नी ! पहिला “सडक सहकारी केन्द्रीय संघ” दर्ता गर्नु पर्यो । हामीले संस्थागत आन्दोलन गर्नुपर्यो ।

हामी केन्द्रीय संघ, नीयामक नीकायमा ताला लगाउन सक्ने छौं । उस्तै परे सहकारी नीयामक नीकायका कर्मचारीलाई ठेगान लगाउछौं, सकभर नोटले, त्यसपछि ओठ त्यस पछि पनि नभए चोटले । हामीलाई मान्य नहुने नीति नियम जारी हुन खोजे, आन्दोलन गर्छौं । उस्तै परे हाकिमलाई सरुवा गर्न सक्ने सम्मका छौं । सबैलाई उर्दी गर्छौं सडकमा आउन, आएत ठिकै छ नआए हाम्रो विरोधी ठानी अलग पार्टीका रहेछन् भन्छौ । हाम्रो पार्टीमा आउन विभिन्न ताना वाना बुन्छौं । अभियान सबैको साझा हो, पार्टीगत भागवण्डा हुनुहुदैन यो हाम्रो सिद्धान्त पनि होनी हैन र । हामी सँग विचार मिलेन भने र सरकारी नीकाय सँग मिल्यो भने मात्रै पनि उनीहरु विरुद्ध आन्दोलन गर्छौं । तर संस्थागत हुनु पर्यो नी, सडक संघ दर्ता गर्नु पर्यो । अरुले केन्द्रीय संघ हुँदा हुँदै,जुनार,उखु, दूध, मौरी, फलफूल तरकारी, माछा, प्याज, आलु, बन्दाकोपी किनहुने । सुपारी हुने नरिवल किन नहुने, माछा हुने कुखुरा किन नहुने, चियाको हुने कफिको हुने, बचत तर बहुउद्देश्यीय हुने, उपभोक्ताको हुने जडीबुटी र विउ विजनको हुने अनी सडकको किन नहुने, उद्देश्य छुटिएन, महिला पुरुष के हो थाहा भएन भन्नु होेला । याहाँ तेश्रो लिङ्गी पनि त छन् नी । नपुंसकको किन नहुने त्यसैले सडक संघ चाहियो, उद्देश्य फरक फरक राखेपनि सबैले गर्ने त त्यही बचत त रहेछनी । प्रारम्भिक संस्था देखि जिल्ला संघ, केन्द्रीय संघ सम्म, उद्देश्य बहुउद्देश्यीय राखेपनि पैशाको दुकान न राख्ने रहेछ । किन्ने र बेच्ने किन चाहियो उद्देश्य ? हामीलाई सडक सहकारी केन्द्रीय संघ चाहियो दर्ता गरी पाउँ । तपाईलाई नी फाइदा हाम्लाई पनि फाइदा ।

दुवै तिर फाइदा हुने यो काइदाको संघ दर्ता गरी पाउँ । अब हेर्नुस, म फलानोको अध्यक्ष त्यसको सदस्य, उ त्यसको कोषाध्यक्ष, अनी त्यसको सचिव, अनी उसमा चाही सल्लाहाकार, त्यो चाही भर्खर । अनी उ चाँही मेरोमा कार्यकारी, उसकोमा सचिव, त्यसकोमा अध्यक्ष ,अनी उ त्यो पल्लोमा प्रबन्धक । अनी यिनी चाँही, मेरोमा सञ्चालक उसकोमा प्रबन्धक, यिनकोमा अध्यक्ष, उसकोमा, उपाध्यक्ष नजिकैकोमा कोषाध्यक्ष, अनी त्यो चाही मेरो भाई उसको सालो, हाम्रोमा पालै पालो । हामी सबै योग्यता र क्षमता वान पूर्ण रुपमा सक्षम, संघ दर्ता गरि पाउ । परि आउँदा अघि सरुँला, हाम्रो पायक नीति आए ठिकै छ नत्र आन्दोलन गरुँला । कहिले तपाईलाई देखाउला कहिले कस्लाई । सारै काईदा दुवैतिर फाइदा । अब राजनीति हामले घुस्न दिन्नम्, हाम्रोपार्टी बाहेक अरुलाई चान्सनै छैन घुसिहाले भने आन्दोलन गरुला ।

यसैले संस्थागत गर्न संघ दर्ता गरिदिम् । सबैको हुने हाम्रो किन नहुँने ? उद्देश्य मिलेनकी लिङ्ग छुटिएन । क्याफेमा रात्री भोज पुगेनकी, खाममा दाम ? देश विदेश घुमुम्ला, भाषण मिठा गरुला राजनीति ठाउको ठाउ सिध्याउने भन्दै कुर्लुम्ला टाउका गनेर पहिचान गरेर दोस्ती गरुँम्ला । तपाई बहाना खोज्नु होला हामी हुन्न हुन्न भनुँम्ला, दुवैलाई फाइदा । दर्ताको काँइदा सडक सहकारी केन्द्रीय संघ दर्ता गरुम त । वर्तमान सहकारी मासिकबाट ।