नेपालमै पहिलो पटक सहकारीले पशुलाई सुत्केरी खर्च दिइने

पाल्पा । सरकार तथा स्वास्थ्य जनसंख्या मन्त्रालयले मानवीय क्षेत्रमा लागु गरेको सुत्केरी खर्च कार्यक्रम यतिखेर पशुमा पनि लागु भएको छ । सीताकुण्ड दुग्ध उत्पादक सहकारी संस्था रामपुरले कृषकलाई व्यवसायिक पशुपालन तर्फ आकर्षित गराउन पशुमा सुत्केरी खर्च कार्यक्रम ल्याएको हो ।

नेपालमै पहिलो पटक यस सहकारीले पशुमा सुत्केरी खर्च कार्यक्रम ल्याएपछि कृषकहरु यतिबेला पशुपालन व्यवसायतर्फ आकर्षित भएका छन् । सहकारी संस्थामा बिमा गरेका पशु सुत्केरी भएमा संस्थाले सुत्केरी खर्च रकम वापत पाँच सय रुपैयाँ किसानलाई दिने गरेको छ । पशुमा सरसफाई गर्ने चेतना जागोस् र सुत्केरी अवस्थामा खानपानमा कुनै कमी नहोस् भनी किसानमा जनचेतना फैलाउन सहकारीले सुत्केरी खर्च कार्यक्रम ल्याएको हो । सहकारी संस्थाका अध्यक्ष कृष्णकुमार अर्यालका अनुसार सहकारी भनेको सहकार्य गरेर अगाडी बढ्ने हो, नाफामुखी गर्ने होइन । किसानलाई व्यवसायिक बनाउन संस्थाले प्रत्यक्ष लाभान्वित हुने खालका कार्यक्रम संचालन गरेको बताए ।

सहकारीले पशुमा सुत्केरी खर्च कार्यक्रम ल्याएपछि संस्थामा अहिले पशु बिमा गर्ने र व्यवसायिक रुपमा पशुपालन गर्ने कृषकको संख्या बढ्न थालेको व्यवस्थापक हरिप्रसाद सिग्देलले बताए । गाईको सुत्केरी खर्च रकम वापत संस्थाले ७ दिनमा नै पाँच सय रुपैयाँ रकम दिएको कृषक राधादेवी न्यौपानेले बताइन् । कृषक विष्नुदेवी गैरे भन्छिन्“हिजोआज त पशुपालन व्यवसाय सुरु गरे मात्र भो,बिमा गर्ने,रोग लागेमा उपचार गर्ने काम सबै सहकारीले गरीदिएको हुँदा व्यवसाय गर्न सजिलो भएको छ,अहिले त झन् सुत्केरी खर्च पनि पाइने रहेछ”। गाई ब्याएको १७ दिनमा सहकारीले दिएको सुत्केरी खर्च रकमले गाईलाई नै भिटामिन किनेर खुवाएको केशवराज भण्डारीले बताउँछन् । गाउँकै छिमेकीहरुले पशुमा सुत्केरी खर्च रकम पाएको देखि मणिरत्न डोटेलले पनि संस्थामा पशु बिमा गरेको बताए ।

हिजोआज पशुमा सुत्केरी खर्च रकम दिन थालेपछि संस्थामा पशु बिमा गर्ने किसानको प्रतिस्पर्धा बढेको पशु बिमा समिति रामपुरका संयोजक नगिलाल पौडेल बताउँछन् । यस सीताकुण्ड दुग्ध उत्पादक सहकारी संस्थाले पाल्पा जिल्लाका पूर्वी भेगका मित्याल, गल्धा, झिरुवास, सिलुवा, बाकामलाङ्ग, सहलकोट, रामपुर, हुँगी स्याङ्गजा, तनहुँ र नवलपरासी जिल्लाका विभिन्न स्थानका पशुपालक किसानलाई सेवा दिदै आएको छ ।