'भारतीय सहयोगमा शंका नगर्नोस्'

रणजीत राय, भारतीय राजदूत

विनाशकारी भूकम्पको समयमा भारतले अन्य कुनै कुरा नसोची एउटा दायरामा बसेर सीधा सहयोगी हात मात्र अघि बढाएको छ । यस्तो अवस्थामा एक छिमेकले अर्कोलाई गर्नसक्ने सबै सहयोग गर्छ । यसमा शंका गर्न मिल्दैन । त्यो हाम्रो कामबाट देखिएको हुनुपर्ने हो । नेपाली सेनासँगको सहकार्यमा हामीले धेरै काम गरेका छौं । उद्धारमा खटिएका छौं । भारतबाट उच्च तहका सफल टोलीहरू पनि आएका छन् । भारतले तत्काल उद्धार, बस्ने व्यवस्था र खानेकुरा उपलब्ध गराउने देखि घाइतेको उपचारमा समेत खटिएको छ । उद्धारमा एक हजारभन्दा बढी भारतीय जनशक्ति खटिएको छ । यहाँ दूतावासमा रहेकाहरू पनि सक्रिय रूपमा उद्धारकार्यमा लागेका छन् ।

चौबीसै घण्टा उद्धार र राहतमा लागेका छौं । हामीले को नेपाली को भारतीय भनेर सहयोग गरेका छैनौं । सबैलाई एक स्थानमा राखेर सहयोगी भावनाले काम गरेका छौं ।

केन्द्रीय सरकारले मात्र होइन प्रान्तीय सरकारले पनि सहयोग गरिरहेको अवस्था छ । आज मात्र पश्चिम बंगालकी मुख्यमन्त्री ममता बनर्जीबाट एक लाख तथा त्रिपाल काँकडभिट्टाबाट काठमाडौं आउँदै गरेको छ ।

यसमा नेपाल सरकारको तदारुकता पनि उत्तिकै छ । सरकारले आफ्नो तर्फबाट गर्न सक्ने सबै उपाय अवलम्बन गरेको छ । नेपाली सेनाको सक्रियताको जति प्रशंसा गरे पनि पुग्दैन । सरकारले आएका सामान भन्सार छुटाउन र व्यवस्थापनमा देखाएको तत्परता प्रशंसनीय छ । कसैले सोच्दै नसोचेको घटना भएपछि त्यो समाधानमा केही अलमल हुनु स्वभाविक हो । यसलाई आलोचनाको पाटो बनाउन हुन्न । अहिले काठमाडौंमा विदेश मन्त्रालयका जेएस नर्थ अभय ठाकुरको नेतृत्वमा व्यवस्थापन कार्य भइरहेको छ ।

दूतावास उत्तिकै सक्रिय रूपमा लागेको छ । दूतावासले अन्य सबै कामहरू रोकेर राहत, उद्धारमा लागेको अवस्था हो । सरकारको संयोजनमा जतिसक्दो धेरै स्थानमा हामी पुगेका छौं ।

भारतले नेपालमा कुनै राजनीति गर्न चाहँदैन र भएको पनि छैन । यस्तो समयमा यस्ता विषय बाहिर आउँदा काम गर्नेहरूको हौसलामा आँच आउने हुनाले यस्ता अफवाह बाहिर नआए राम्रो हुन्छ । यदि कतै चित्त नबुझेको अवस्थामा सीधा भन्दा वा सूचनालाई एकपटक भेरिफाइ गर्नसमेत आग्रह गर्छु । यस्तो अवस्थामा शंका गरेर जुधेर विरोध गरेर बस्ने होइन कतै न कतै उद्धार राहतमा लाग्ने हो ।

भारत मात्र होइन अन्य मित्र मुलुकले समेत नेपाललाई सहयोग गरिरहेका छन् । यसको संयोजन कम चुनौतीपूर्ण भने छैन । तर, पनि सरकारले यसमा सफलता नै पाएको मान्नुपर्छ । अहिलेको अवस्था पुन:स्थापनाभन्दा पनि तत्काल राहत र उद्धार नै हो । अब बिस्तारै पुन:स्थापनामा जाने हो । त्यसका लागि पनि भारतले सघाउनेमा दुईमत छैन । भारतका प्रधानमन्त्री नरेन्द्र मोदीजीबाटै यति धेरै चासोका साथ यहाँ कुनै कमी– कमजोरी नहोस् भन्दै सहयोग गर्न आग्रह गरेका छन् । व्यक्तिगत तर्फबाट पनि भारतको सहयोगहरू आइरहेको अवस्था छ । यसबाट पनि हाम्रो दुईपक्षीय सम्बन्ध उजागर हुन्छ । ट्रमा सेन्टरले पूर्ण रूपमा सेवा दिएको छ । त्यसका लागि भारतबाट विशिष्ट ३१ चिकित्सक त्यहाँ रहेका छन् । त्यसको साथै अस्थायी रूपमा अन्य दुई स्थानमा मेडिकल सेन्टर राखेर काम गरेका छौं । सबै उत्तिकै सक्रिय छन् । नेपाल सरकारले आफूले चाहेको जति माग्न सक्छ । राहत हामीसँग उपलब्ध भएजति दिइरहेका छाैं । सबै प्रभावित क्षेत्रमा हाम्रो उद्धार टोली पुगेका छन् । हिमालयन बेसक्याम्पदेखि अन्य क्षेत्रसम्म पुगेका छन् । विशिष्ट टोलीले काम गरेका छन् । उद्धार सहयोगमा आएका सबैसँग धैर्य राखेर सहानुभूति दिएर काम अघि बढाउन आवश्यक छ । यहाँ धेरै मानिस अहिले पालमा बसेकाले स्वास्थ्यमा ध्यान दिनुपर्ने हुन्छ । यस्तो अवस्थामा सबैको ध्यान जान पनि आवश्यक छ । महामारी फैलिनबाट पनि बचाउन आवश्यक छ । त्यसमा सबै सजक हुनुपर्छ । मानवीयतामा राजनीतिकरण गर्न हुँदैन ।

– अाजकाे कान्तिपुर दैनिकबाट