राष्ट्रिय सहकारी संघले प्रधानमन्त्री दैवी प्रकोप उद्दार कोषमा २५ लाख जम्मा गर्ने

काठमाडौं । गत बैशाख १२ गते गएको विनाशकारी भुकम्प पीडितको सहयोगकालागि राष्ट्रिय सहकारी संघले प्रधानमन्त्री दैवी प्रकोप उद्दार कोषमा २५ लाख जम्मा गर्ने निर्णय गरेको छ ।

संघका अध्यक्ष केशवप्रसाद बडालको अध्यक्षतामा वसेको संघका सञ्चालकहरु, केन्द्रीय सहकारी संघहरू र राष्ट्रिय सहकारी बैकका प्रतिनिधिहरुको आकस्मिक वैठकले सो निर्णय गरेको हो ।

संघले सम्पूर्ण सहकारीकर्मीहरूका साथै आमसमुदायमा मन, वचन र कर्मले भुकम्पबाट पीडित व्यक्तिहरूको उद्धार तथा राहत कार्यमा संलग्न हुन समेत अपिल गरेको छ । वैठकले सहयोगलाई निरन्तरता दिनका लागि सम्पूर्ण सहकारी संघ संस्थाहरु र राष्ट्रिय सहकारी बैकले प्रतिवद्धता व्यक्त गरेको संघका सञ्चालक तथा सूचना सञ्चार समितिका संयोजक चन्द्र ढकाले जानकारी दिए ।

वैठकले महाभुकम्पबाट पीडितहरूको उद्धारका लागि केन्द्रस्तरमा राष्ट्रिय सहकारी संघ र जिल्ला स्तरमा जिल्ला सहकारी संघका प्रतिनिधिहरुलाई सहभागी गराई यस क्षेत्रको प्रतिनिधित्वका लागि अनुरोध गरेको छ । साथै राष्ट्रिय सहकारी संघको आव्हान अनुसार अन्तराष्ट्रिय सहकारी महासंघ लगायतका अन्तराष्ट्रिय संघ संस्थाहरुद्वारा सहयोग गर्ने वचनवद्धता जनाएको ढकालले जानकारी दिए ।