उच्चस्तरमा भारतीय सहयाेग (फोटो सहित)

काठमाडौं । भूकम्पका कारण विपत्तिमा परेको नेपाललाई छिमेकी मुलुक भारतले निरन्तर सहयोग गरिरहेको छ ।

भूकम्प गएकै दिनदेखि भारतले नेपालमा राष्ट्रिय आपदा मोचन बल सहित विशेष विमान, बचाव जनशक्ति र राहत उपलब्ध गराएर सहयोग गरिरहेको हो । भारतको सम्पूर्ण सहयोग, राहत र बचाव नेपाल सरकारको अनुमति र निगरानीमा तथा भारतीय सम्पूर्ण अधिकारीहरु नेपाली अधिकारीको संयोजनमा काम गरिरहेको भारतीय दूतावासद्वारा जारी विज्ञप्तिमा उल्लेख छ ।

हालसम्म भारतले दुई सय ८० टन पिउने पानी, दूध, बिस्कुट, चाऊचाऊ, अत्यावस्यक औषधि, त्रिपाल, कम्बल लगायत राहत सामग्री पठाएको छ । यससँगै भारतले नेपालको विपतमा सहयोग गर्न दुई क्षेत्रमा अस्पताल, १८ वटा सैनिक मेडिकल टीम, १८ इंजिनियर टोली, एक आईएएफ तीव्र एक्शन मेडिकल टीम र भग्नावशेष उत्खनन् गर्ने अत्यावश्यक मेशिनहरु पठाएको छ । भारतले नेपाल भारत सीममा रहेका भारतीय अधिकारीलाई पनि राहत तथा बचाव कार्यमा सघाउन निर्देशन जारी गरेको छ ।

भारतबाट खटिएका राष्ट्रिय आपदा मोचन बलका १६ टीमले नेपालको विभिन्न स्थानमा रहेका नेपाली टोलीसँग मिलेर विभिन्न विश्वसम्पदा साइटहरुका भग्नावशेषबाट ११ जनाको उद्धार र १२१ मृत शरीर बाहिर निकालेको विज्ञप्तिमा जनाएकाे छ ।

भारतले महाभूकम्पको केन्द्रविन्दु रहेको गोरखाको बारपाक गाउँमा तीन भारतीय सैनिक स्वास्थ्य टोली खटाएको छ । त्यस्तै ३९ वटा सैनिक टोली सगरमाथाको बेस क्याम्पमा फसेका आरोहीका उद्धारमा खटिएका जनाइएको छ । भारत सरकारको तर्फबाट गोरखा, धादिङ, सिन्धुपाल्चोक, नुवाकोट, रसुवा र रामेछाममा करिब १०० टन राहत सामग्री उपलब्ध गराइएको छ । भूकम्पले विच्छेद भएको विद्युत आपूर्तिका लागि पावर ग्रिड करपोरेशन अफ इन्डियाले नेपाल विद्युत प्राधिकरणसँग मिलेर नेपालभरी विद्युत सुचारु गर्ने कार्यलाई तीव्रता दिएको छ ।

विपतको भयानक घडीमा भारतले नेपाललाई हरेक तरिकाले निरन्तर सघाउन तत्पर रहेको जनाइएको छ । जुन कुरा भारतीय प्रधानमन्त्री मोदीले समेत व्यक्त गरिसकेका छन् ।