यसरी मनाइदै छ धादिङमा ‘सहकारी दिवस’

धादिङ । ५८ औं राष्ट्रिय सहकारी दिवस धादिङमा पनि विविध कार्यक्रम गरी मनाइदै छ ।

जिल्ला सहकारी संघ, विषयगत जिल्ला सहकारी संघ र प्रारम्भिक सहकारी संस्थाहरुको उपस्थितिमा जिल्ला सहकारी संघ धादिडका अध्यक्ष्य नेत्रराज पौडेलेको अध्यक्षतामा बसेको बैठकले दिवस भव्यताका साथ मनाउने निर्णय गरेको छ ।
बुधबार संघका अध्यक्ष नेत्रराज पौडेलको अध्यक्षतामा डिभिजन सहकारी कार्यालय १, विषयगत जिल्ला सहकारी संघ ५ र धादिड जिल्लाका सहकारी संस्था ४१० सहित ४१७ सदस्य मूल समारोह समितिकोे गठन गरिएको छ ।

बैठकले सहकारी दिवस मनाउनका लागि जिल्लाका सहकारी संघ संस्थाले आफूलाई पायक पर्ने आफ्नो कार्यक्षेत्रमा कार्यक्रमको आयोजना गरी सहकारी दिवस मनाउन र जिल्लाको सदरमुुकाममा उपस्थित हुन सक्ने सहकारी संघ/संस्थालाई सदरमुकाममा आयोजना हुने कार्यक्रममा सहभागी हन अनुरोध गरेको छ ।

चैत २० गते विहान सदरमुकाम आसपासका सहकारी संस्थाहरुको व्यानर सहितको र्यालीमा सहभागी गराइने जनाएको छ । ¥यालीमा उत्कृष्ट सहभागीता, अनुशासित सहकारीलाई पुरस्कृत गरिने जनाएको छ । र्यालीको स्वतन्त्र मूल्यांकन गर्न नेपाल पत्रकार महासंघ धादिडलाई अनुरोध गर्ने डिभिजन सहकारी कार्यलय धादिङका प्रमुख कृष्णबहादुर बोहराले जानकारी दिए ।

त्यस्तै जिल्लामा वर्षभरी उत्कृष्ट काम गर्ने, सफल सहकारीका संचालक तथा कर्मचारीलाई पनि दिवसको अवसरमा पुरस्कृत गरिने कार्यक्रम तय गरिएको छ ।