सहकारी र संचारबीच सहकार्य आवश्यक : उप्रेती

काठमाण्डू । राष्ट्रिय सहकारी बैंकका प्रवन्ध संचालक केवी उप्रेतीले सहकारी संघ/संस्था र संचारबीच एक आपसमा सहकार्य गर्न आवश्यक रहेको बताएका छन् । यी दुई निकाय बीच एक आपसमा सहकार्य गरेर अघि बढ्न सके मात्र सहकारी अभियानले फड्को मार्ने उनको भनाई थियो ।

सोमबार नेपाल सहकारी पत्रकार समाज (सिजेएन) र जिल्ला सहकारी संघ काठमाण्डूबीच भएको परिचयात्मक कार्यक्रममा उनले सो कुरा बताएका हुन् । संघका पूर्व अध्यक्ष समेत रहेका उप्रेतीले जिल्ला संघ र सहकारी बैंक सहकारी पत्रकार समाज संग सहकार्य गर्न तयार रहेको बताए । ‘के कति सकिन्छ त्यो अलग कुरा हो । तर हामी एक आपसमा संग संगै जाने कुरामा म सधै तयार छु ।’ उनले भने । पत्रकारहरुले समाचार लेख्दा रिसर्च गरेर, सोधेर मात्र लेख्नु पर्ने उनको भनाई थियो । ‘तीन खम्बे औचित्य होइन भन्ने ढंगले जुन कुराहरु आइरहेको छ । संविधानमा उल्लेख भएको कुरा चल्नु ठिक होइन । यो कुरामा जिल्ला संघले महत्वपूर्ण खेल्नु पर्छ । यि र यस्ता कुरामा पत्रकारहरु संग सहकार्य गरेमा जानु पर्छ ।’ उप्रेतीले भने ।

कार्यक्रममा जिल्ला संघ काठमाडौंका अध्यक्ष टेक प्रसाद चौलागाईले आगामी दिनमा जिल्ला संघ र पत्रकार एक आपसमा मिलेर जाने बताए । ‘तपाइहरु कार्यक्रम लिएर आउनुस् । हामी मिल्ने सम्म काममा सहकार्य गर्न तयार छौं । उनले भने । त्यस्तै सहकारी पत्रकार समाजका अध्यक्ष डिल्ली प्रसाद सापकोटाले संघले पत्रकारहरुको क्षमता अभिवृद्धिका लागि शिक्षा, तालिम र भ्रमणमा जोड दिनुपर्ने बताए ।

कार्यक्रममा जिल्ला संघका उपाध्यक्ष ज्ञानबहादुर तामाङ, महिला उपाध्यक्ष शोभा सापकोटा, महासचिव खेमराज सुवेदी, सचिव रामचन्द्र अर्याल लगायत संचालकहरुको उपस्थिती रहेको थियो । त्यस्तै सहकारी पत्रकार समाजका सल्लाहकार यादव हुमागाई, उपाध्यक्ष राजेश खनाल, सचिव खिलानाथ दाहाल, कोषाध्यक्ष काजी श्रेष्ठ लगायत सदस्यहरुको उपस्थित रहेको थियो ।