राष्ट्र बैंकका १६ औं गभर्नर नेपाल

काठमाडौं । डाक्टर चिरञ्जीवी नेपाल राष्ट्र बैंकको गभर्नरमा नियुक्त भएका छन् । आज बसेको मन्त्रिपरिषदको बैठकले पाँचवर्षे कार्यकालका लागि नेपाललाई गभर्नर पदमा नियुक्त गरेको हो । एक दर्जन बढी आकांक्षी र दुईजना प्रतिस्पर्धीलाई पछार्दै डा नेपाल मुलुकको केन्द्रीय बैंकको १६ औं गभर्नर बनेका हुन ।

फागुन १२ गते अर्थमन्त्री डा. रामहरण महतको संयोजकत्वमा मन्त्रिपरिषदले गठन गरेको गभर्नर सिफारिस समितिले बुधबार नै नेपाल र राष्ट्र बैंकका डेपुटी गभर्नरद्वय गोपाल काफ्ले र महाप्रसाद अधिकारीको नाम गभर्नरका लागि सिफारिस गरेको थियो । मन्त्रिपरिषदको आजको बैठकले समितिले सिफारिस गरेका तीन जनामध्येबाटै नेपाललाई गभर्नरमा नियुक्ति गरेको हो ।

गभर्नर सिफारिस समितिमा संस्थापक गभर्नर हिमालयसमशेर राणा, अर्थशास्त्री पार्थिवेश्वर तिमल्सिना सदस्य रहेका थिए । नवनियुक्त गभर्नर डा नेपाल यसअघि प्रधानमन्त्रीका आर्थिक सल्लाहकारका रूपमा कार्यरत थिए ।