महिला सहकारीको क्षमता विकासका लागि तालिम

मकवानपुर । डिभिजन सहकारी कार्यालय हेटौडाको आयोजनामा संचालित ६ दिने सहकारी व्यवस्थापन तालिम सम्पन्न भएको छ । जिल्लामा संचालित महिला सहकारी संस्थाहरुको क्षमता तथा नेतृत्व विकास गर्ने उद्देश्यले तालिम संचालन गरिएको डिभिजन सहकारी कार्यालय हेटौडाको प्रमुख भिम परियारले जानकारी गराए ।

६ दिन सम्म संचालन भएको तालिम कार्यक्रममा सहकारी व्यवस्थापनका विविध २२ वटा कक्षा संचालन गरिएको थियो । ग्रमिण भेगमा दर्ता भएका महिला सहकारी संस्थाहरु विशेष गरी कृषि, बचत र वहुउद्देश्यीय सहकारी संस्थालाई लक्षित गरी तालिम संचालन गरिएको कार्यालयले जनाएको छ ।

जिल्लाको दुर्गम भेग मंथली, नामटार, छतिवन, भिमफेदी, आमभञ्ज्याङ, पदमपोखरी, वसामाडी र हेटौडा उपमाहानगरमा संचालित सहकारी संस्थाका संचालक तथा व्यवस्थापकहरु सहभागी थिए । २५ जनाको सहभागी रहेको तालिममा २ जना मात्र पुरुषको सहभागीता रहेको थियो । महिलाको मात्रै उच्च सहभागीता रहेको तालिम जिल्लामानै पहिलो पटक आयोजना गरिएको डिभिजन प्रमुख परियारले वताए । महिला, दलित, जनजाति र लक्षित समुदायद्धारा संचालित सहकारी संस्थाका लागि आगामी दिनमा प्राथमिकताका साथ यस्ताखाले तालिम कार्यक्रम आयोजना गरिने उनले बताए ।

कार्यक्रम राष्ट्रिय सहकारी संघका संचालक तथा जिल्ला सहकारी संघ मकवानपुरका अध्यक्ष वद्री लम्सालको प्रमुख आतिथ्या एवं डिभिजन सहकारी कार्यालय हेटौडाको प्रमुख भिम परियारको सभाध्यक्षतामा सम्पन्न भएको हो । कार्यक्रममा जिल्ला वहुउद्देश्यी सहकारी संघ मकवानपुरका अध्यक्ष रामहरी न्यौपानेको समेत सहभागीता रहेको थियो ।