खराब व्यक्तिहरुका कारण सहकारी क्षेत्रकै बदनामः कानूनमन्त्री

काठमाडौं । कानूनमन्त्री नरहरी आचार्यले सहकारी क्षेत्रको ब्यवस्थापन चुनौतीपूर्ण रहेको बताएका छन् । राजधानीको बसुन्धरास्थित क्याराभान बचत तथा ऋण सहकारी संस्थाको छैठौं साधारणसभाको उद्घाटन गर्दै कानूनमन्त्री आचार्यले सहकारीको संख्या दिनप्रतिदिन बढ्दै गएको कारण ब्यवस्थापनमा समस्या भएको बताए ।
‘केही खराब व्यक्तिहरुका कारण सहकारी क्षेत्रकै बदनाम भइरहेको छ,’ मन्त्री आचार्यले भने, ‘सहकारी क्षेत्रकै बदनाम हुने क्रियाकालाप तर्फ सवैजना सचेत हुनुपर्दछ ।’
पूर्व सभासद ऋषिबाबु परियारले सहकार्यविना कुनै काम सम्पन्न नहुने भएकाले सहकारीकर्मीहरुबीच सहकार्यको आवश्यकता औंल्याए । संस्थाको प्रगतिका लागि पनि सदस्यहरुबीच सुमधुर सम्बन्धको खाँचो रहने उनको भनाई थियो ।
कार्यक्रममा सक्षम बचत तथा ऋण सहकारी संस्थाका अध्यक्ष चित्रकुमार दाहाल, आइएमई बहुउद्देश्यीय सहकारी संस्थाका कार्यकारी प्रमुख अर्जुन शर्मा पौडेल, काठमाडौं वडा नं. ३ का पूर्व वडाध्यक्ष दीपक केसी लगायतले सहकारीको समस्या सहकारीकर्मीहरुको नियतले मात्रै समस्या हुने बताए ।