उपत्यकाको सडक विस्तारको अनुगमन

काठमाडौं । प्रधानमन्त्री तथा मन्त्रिपरिषद्को कार्यालयका सचिव शान्तराज सुवेदीको नेतृत्वमा काठमाडौं उपत्यकाको सडक विस्तार‚ मर्मत तथा निर्माणको अनुगमन गरिएको छ ।

अनुगमनका क्रममा सडक‚ खानेपानी‚ ढल निकास‚ विद्युत तथा टेलिफोनका तारहरुको व्यवस्थापन एवं पार्क तथा बगैंचाहरुको अवस्था र तिनीहरुको उचित मर्मत‚ सम्भार र संरक्षणमा तत्काल आवश्यक कदम चाल्न सचिव सुवेदीले सम्बन्धित पदाधिकारीहरुलाई निर्देशन दिए ।

सडक मर्मत र विस्तार गर्दा खानेपानीका पाइप विछ्याउने‚ ढल निर्माण र मर्मत गर्ने र विद्युत तथा टेलिफोनका पोल तथा तारहरु संगसगै व्यवस्थापन गर्नु पर्नेमा एक आपसमा समन्वय र सहकार्यको अभावमा कतिपय ठाउँमा दुरसञ्चारका तारहरु नहटाइएको‚ विद्युतका पोल तथा ट्रान्सफर्मरहरु नसारिएको‚ भत्काउनु पर्ने संरचनाहरु पनि समयमा भत्काउन नसकेको जस्ता कारणबाट स्थानीय जनताले धुलो‚ धुँवा‚ हिलो र खाल्डाखुल्डी भएको सडकमा हिड्न बाध्य हुनुपरेको पनि सचिव सुवेदीले बताए । सरकारी पक्षबाट समयमा कार्यसम्पन्न हुन नसक्दा सरकार प्रति जनताको दृष्टिकोण नकारात्मक हुँदै गएको हुनाले सम्बन्धित निकायहरुले सक्रियतापूर्वक कार्य सम्पादन गर्न पनि निर्देशन दिए ।
‘म पटक पटक सडक विस्तारको अनुगमनमा सम्बन्धित निकायका जिम्मेवार पदाधिकारीहरुलाई संगै लिएर हिडिरहेको छु । स्थानीयस्तर मै जनताका गुनासाहरु सुन्छु र सम्बन्धित पदाधिकारीहरुलाई यो समस्या कति समयमा समाधान हुन्छ भनेर स्थानीय जनताकै अगाडी भन्न लगाउँछु ।’ उनले भने ।