सहकारी एकीकरण अभियानको पक्षमा नेफ्स्कून रहेको महासचिव परितोष पौड्यालको कथन

सिमरा । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) का महासचिव परितोष पौड्यालले सहकारीको एकीकृत सञ्चालन प्रणाली र एकीकरण अभियानको पक्षमा नेफ्स्कून रहेको बताएका छन् ।

सोमबार सर्लाहीको हरिवनमा आयोजित जिल्ला बचत तथा ऋण सहकारी संघको पांचौ वार्षिक साधारणसभाको उदघाटन गर्दै पौडेलले सहकारी जागरणबाट सशक्तीकरण र गुणात्मक विकासको चरणमा अग्रसर रहेको बताए । पौड्यालले सहकारी संघसंस्थाहरुलाई सुशासित र मर्यादित बनाउन सहकारीकर्मीहरु क्रियाशिल हुन आग्रह समेत आग्रह गरे ।

कार्यक्रममा बोल्दै नेफ्स्कूनका सञ्चालक तथा हरिवन फिल्ड कार्यालयका संयोजक कृष्ण पौडेलले सर्लाहीले मध्यतराईको सहकारी अभियानमा पुर्याएको योगदानको चर्चा गर्दै यसलाई अनुशासित र गुणात्मक बनाउन सबैले ध्यान दिनुपर्ने बताए । नेफ्स्कूनका सञ्चालक दीपक पनेरुले तराईका सहकारीहरुलाई कृषि क्षेत्रको समृद्धिसंग जोडनुपर्ने त्यसका लागि बचत तथा ऋण सहकारीहरुले अभियान चलाउनुपर्ने बताए ।

कार्यक्रममा उत्कृष्ट तथा सहयोगी सहकारीहरु बागमती स्वावलम्वन बचत तथा ऋण सहकारी संस्था, जयमां सन्तोषी महिला, जनमुखी, श्रीहरि, ग्रामिण युवा, सगुन सहकारी तथा सहकारी अयिभन्ताहरु बलबहादुर कार्की, सुरेन्द्रलाल कर्ण र महम्मद अख्तर अन्सारीलाई सम्मान गरिएको थियो ।

उदघाटन सत्रपछि आयोजित बन्दसत्रले बाबुराम घिमिरेको अध्यक्षतामा नयां सञ्चालक समिति गठन गरेको छ । समितिमा उपाध्यक्ष हरेन्द्र रावत, सचिव जवाहरलाल यादव, कोषाध्यक्ष विन्दु चालिसे, सञ्चालकहरु लालबाबु महतो, पांचु महतो, झगरु साह, भगवती ढकाल, सुभद्रा महतो हुनुहुन्छ । त्यसैगरी लेखा समितिमा संयोजक श्यामबाबु कार्की र सदस्यहरु बहादुरसिंह खडका र सन्तोष आचार्य रहेका छन् ।

करीव ८७ बचत तथा ऋण सहकारी संस्थाहरु आवद्ध रहेको संघले जिल्लाको सहकारी अभियानको अगुवाई गरिरहेको छ ।