नेपाल र भारतबीच द्विपक्षीय सहयोग सम्झौतामा हस्ताक्षर

काठमाडौं । नेपाल र भारतबीच विभिन्न द्विपक्षीय सहयोग सम्झौतामा हस्ताक्षर भएको छ ।

प्रधानमन्त्री तथा मन्त्रिपरिषद् कार्यालयमा आज (मंगलबार) आयोजित विशेष समारोहमा प्रधानमन्त्री सुशील कोइराला र भारतीय प्रधानमन्त्री नरेन्द्र मोदीको उपस्थितिमा उक्त सहयोग सम्झौतामा हस्ताक्षर भएको हो ।

नेपाल प्रहरीको एकेडेमी निर्माणका लागि भारतले उपलब्ध गराउने सहयोग सम्झौतामा अर्थ मन्त्रालयका सचिव सुमनप्रसाद शर्मा र भारतीय गृह मन्त्रालयका सचिव स्नेहलता कुमारले हस्ताक्षर गरे ।

काभ्रेको पनौतीमा स्थापना गरिने राष्ट्रिय प्रहरी प्रतिष्ठान आयोजना कार्यान्वयनका लागि भारत सरकारले करिब आठ अर्ब ७९ करोड अनुदान सहायता प्रदान गरेको हो ।

यस्तै दुई मुलुकबीच पर्यटन विकास गर्ने समझदारीपत्रमा समेत हस्ताक्षर भएको छ । उक्त समझदारीपत्रमा संस्कृति पर्यटन तथा नागरिक उड्डयन मन्त्रालयका सचिव सुरेशमान श्रेष्ठ र नेपालका लागि भारतीय राजदूत रणजित रायले हस्ताक्षर गरे ।

नेपाल र भारतबीच एक अर्को मुलुकमा पर्यटन आदानप्रदान गर्ने र पर्यटन क्षेत्रको विकासमा मिलेर काम गर्ने लक्ष्य सो समझदारीपत्रमा उल्लेख गरिएको छ ।

यस्तै परम्परागत औषधि उपचार प्रणाली अवलम्बन गर्ने समझदारीपत्रमा समेत आजै हस्ताक्षर भएको छ । स्वास्थ्य तथा जनसङ्ख्या मन्त्रालयका सचिव शान्तबहादुर श्रेष्ठ र नेपालका लागि भारतीय राजदूत रायले हस्ताक्षर गरे ।

दुई मुलुकका युवा आदानप्रदान गर्ने सहयोग सम्झौतामा समेत आजै हस्ताक्षर भएको छ । यस्तै जनकपुर–अयोध्या, काठमाडौँ–वाराणसी, लुम्बिनी र वोधगयाबीच भगिनी सम्बन्ध स्थापना गर्ने सहमतिमा समेत हस्ताक्षर भएको छ ।

हस्ताक्षर समारोहमा प्रधानमन्त्री सुशील कोइराला, उपप्रधानमन्त्री एवम् सङ्घीय मामिला तथा स्थानीय विकास मन्त्री प्रकाशमान सिंह, मन्त्रीगण, मुख्यसचिव र नेपाल सरकारका उच्च अधिकारीहरुको उपस्थिति रहेको थियो ।