धान उत्पादनमा १७ प्रतिशतले वृद्धि

विराटनगर । पूर्वाञ्चलमा गत वर्षको तुलनामा यस वर्ष धान उत्पादनमा १७ प्रतिशतले वृद्धि हुने भएको छ ।

धानबालीको रोपाइँको सुरुको समयमा समुचितरूपमा वर्षा नभएपनि ढिलो गरी वर्षा भएपछि किसानले रोपाइँ गरेका धानबालीमा रोगको प्रकोप नलागेकाले उत्पादनमा वृद्धि भएको हो ।

यस क्षेत्रअन्तर्गत तराईका पाँच जिल्लाका साथै पहाडी र हिमाली जिल्लामा पनि गत वर्षको तुलनामा उत्पादनमा वृद्धि भएको पूर्वाञ्चल क्षेत्रीय कृषि निर्देशनालय विराटनगरका निमित्त प्रमुख मदनकुमार श्रेष्ठले जानकारी गराए ।
गत आर्थिक वर्षमा पूर्वाञ्चलमा ११ लाख ४९ हजार मेट्रिकटन धानबाली उत्पादन भएको थियो भने यस वर्ष १३ लाख ९७ हजार ७६० मेट्रिकटनअर्थात् उत्पादनमा १७ प्रतिशतले वृद्धि हुने देखिएको छ ।

सोअनुरूप, झापामा तीन लाख ३७ हजार ७९२ मेट्रिकटन, मोरङमा दुई लाख ८८ हजार ९२५ मेट्रिकटन, सुनसरीमा एक लाख ६१ हजार ७८४ मेट्रिकटन, सप्तरीमा एक लाख २६ हजार मेट्रिकटन र सिरहामा दुई लाख २० हजार ७२ मेट्रिकटन उत्पादन हुने भएको छ ।

त्यसैगरी, मध्यपहाडका आठअन्तर्गतका इलाममा ३१ हजार २३० मेट्रिकटन, पाँचथरमा २० हजार २४० मेट्रिकटन, धनकुटामा २२ हजार ४३४ मेट्रिकटन, तेह्रथुममा १७ हजार ४९४ मेट्रिकटन उत्पादन हुने भएको छ ।

मध्यपहाडी जिल्लाअन्तर्गतकै भोजपुरमा ३५ हजार ८९३ मेट्रिकटन, उदयपुरमा ४९ हजार ९४५ मेट्रिकटन, खोटाङमा २६ हजार ७५५ मेट्रिकटन र ओखलढुङ्गामा १६ हजार २३४ मेट्रिकटन धानबाली उत्पादन हुने भएको छ ।
त्यसैगरी, उच्च तीन पहाडी जिल्ला सोलुखम्बुमा तीन हजार ५६४ मेट्रिकटन, ताप्लेजुङमा आठ हजार ६३७ मेट्रिकटन र सङ्खुवासभामा ३२ हजार ७६० मेट्रिकटन धानबाली उत्पादन हुने भएको छ ।