सहयोगी बहुउदेश्यीय सहकारी अब आफ्नै भवनमा

काठमाडौं । ललितपुरको पूर्वी भेग लुभुमा अवस्थित सहयोगी बहुउद्देश्यीय सहकारी संस्थाले आफ्नै नवनिर्मित भवनबाट वित्तीय कारोवार शुरु गरेको छ ।

१९ औं वार्षिकोत्सवको उक्त नवनिर्मित सहयोगी भवनको उद्घाटन राष्ट्रिय सहकारी संघका सञ्चालक तथा नेपाल केन्द्रीय बहुउद्देश्यीय सहकारी संघका अध्यक्ष सुरेन्द्र भण्डारीले शनिबार एक कार्यक्रमका बीच गरे । साढे १२ आना जग्गामा निर्मित ३ तले भवन निर्माणका लागि १ करोड ३० लाख रुपैया खर्च भएको जानकारी संस्थाका अध्यक्ष नारायणभक्त श्रेष्ठले बताए ।

२०५३ सालमा स्थापित उक्त संस्थाले सदस्यहरुलाई लक्षित गरी सहयोगी सुपथ मूल्य सहकारी पसल, वेष्ट विङ्ग स्कूल र सहयोगी अर्गानिक कृषि केन्द्र सञ्चालनमा ल्याएको छ । सहकारीले सदस्यहरुको आवश्यकतालाई मध्यनजर गर्दै विभिन्न परियोजनाहरु सञ्चालन गरेको र निकट भविष्यमा बृद्धबृद्धालाई लक्षित गरी सहयोगी जेष्ठ नागरिक गृह समेत सञ्चालनमा ल्याउने श्रेष्ठले बताए । संस्थाको ३ करोड शेयरपूँजी, ३७ करोड ५० लाख बचत संकलन र २६ करोड कर्जा प्रवाह रहेको छ भने संस्थामा २ हजार ३ सय सदस्य आवद्ध रहेका छन् ।

लुभु र लामाटार गाविसलाई आफ्नो कार्यक्षेत्र बनाएर कारोवार गर्दै आएको संस्थाले ८० प्रतिशत लगानी स्थानीय उद्योगधन्दामा गरेको छ । संस्थाले सदस्यहरुको आर्थिक, सामाजिक तथा साँस्कृतिक रुपान्तरणमा महत्वपूर्ण भूमिका निर्वाह गर्दै आएको छ ।