‘साना किसान सम्मेलन २०७१’ सुरु, देशको आर्थिक समृद्धि सबैको साझा एजेन्डा

काठमाडौं । कृषिको व्यावसायिक विकासका लागि कृषकको मनोबल बढाउने उद्देश्यका साथ आजदेखि काठमाडौँमा ‘साना किसान सम्मेलन २०७१’ सुरु भएको छ ।

‘गरिबी न्यूनीकरणका लागि सबल संस्थाको निर्माण’ भन्ने नाराका साथ सम्मेलन आयोजना गरीएको हो । सम्मेलनको उद्घाटन अर्थमन्त्री डा रामशरण महतले आर्थिक वर्ष २०७१÷२०७२ को बजेटमा युवा कृषकलाई प्रोत्साहनस्वरूप एक किसानलाई छ प्रतिशत ब्याजमा ऋण प्रदान गर्ने व्यवस्था गरेको बताए । उनले कुखुरा, बङ्गुर, मौरीपालनलगायतका लागि प्रतिकिसान ५० प्रतिशत अनुदान दिने व्यवस्था गरेको बताए ।

“देशको आर्थिक समृद्धि सबैको साझा एजेन्डा हो, संविधान निर्माणसँगसँगै आर्थिक गतिविधि गर्न जरुरी छ, मुलुकमा राजनीतिक झैझगडा धेरै भयो त्यसको अन्त्य गर्नुपर्छ”–अर्थमन्त्री महत भने । गरिबी निवारणमात्र नभएर मुलुकको आर्थिक समृद्धिमा साना किसानको योगदान महत्वपूर्ण भएको भन्दै उनले नेपालको भौगोलिक बनावटअनुसार फरक–फरक मौसम भएकाले कृषिको व्यापक सम्भावना रहेको बताए ।

नेपाल राष्ट्र बैंकका गभर्नर डा युवराज खतिवडाले जमिनको उत्पादकत्व बढाउन वित्तीय साक्षरता कम गर्नुपर्ने भन्दै व्यावसायिक कृषिका लागि युवा कृषकलाई अगाडि बढाउनुपर्ने विचार राखे । राष्ट्रिय योजना आयोगका उपाध्यक्ष डा गोविन्दप्रसाद पोखरेलले प्राकृतिक विपत्तिबाट साना किसान निकै मर्कामा पर्ने गरेको र त्यसका लागि साना किसानलाई बिमाको व्यवस्था गर्नुपर्ने बताए ।

कृषि मन्त्रालयका निमित्त सचिव उदयचन्द्र ठाकुरले कृषिमा आधुनीकिकरण र व्यवसायीकरण गर्नुपर्ने आवश्यकता भएको बताए। कृषकको क्षति न्यूनीकरणका लागि बाली र पशुपक्षीको बिमा गर्ने व्यवस्था पनि बजेटमा गरिएको जानकारी दिए ।

राष्ट्रिय सहकारी संघका अध्यक्ष केशव बडालले ४४ लाख कृषक सहकारीमा आबद्ध रहेको उल्लेख गर्दै कृषि सहकारीले मुलुकको विकास र रूपान्तरणको जग बसाल्ने काम गरेको बताए । दुईदिने सो सम्मेलनमा ५५ जिल्लाबाट ७५० कृषक प्रतिनिधि रहेका छन् भने सम्मेलनमा साना किसानले उत्पादन गरेका चिया, मह, चामललगायतका १३ वटा प्रदर्शनी कक्ष पनि राखिएका छन् ।