हंसपुरमा कृषि सहकारीद्वारा सामूहिक बाख्रापालन

पोखरा। कास्की जिल्लाको हंसपुर गाविसलाई कार्यक्षेत्र बनाएर गठित आरुखर्क कृषि सहकारी संस्था लिमिटेडले सामूहिक बाख्रापालन व्यवसाय सुरु गरेको छ ।सहकारीले स्थानीय आरुखर्कमा खरिद गरेको ४५ रोपनी जग्गामा निर्माण गरिएको खोरमा ३० वटा माउ बाख्रा र एउटा उन्नत जातको बोको खरिद गरेर सो व्यवसाय सुरु गरेको हो ।
स्थानीय पुँजी, घाँस र जनशक्तिका आधारमा सो बाख्रापालन व्यवसायमा हालसम्म रु २५ लाखभन्दा बढी खर्च भइसकेको संस्थाका सदस्य कालीदास सुवेदीले जानकारी दिए ।
सामूहिक रूपमा सञ्चालन गरिएको सो व्यवसायमा सहकारीका सदस्यले रु १० हजारदेखि तीन लाखसम्म लगानी गरेका छन् भने १०० भन्दा बढी माउ बाख्रा पुर्याउने लक्ष्य रहेको छ । संस्थामा ६० जना सेयर सदस्य आबद्ध रहेका छन् ।
दानामा भन्दा घाँसमा आधारित बाख्रापालन गर्ने उद्देश्यले संस्थाले राइखनियो, बडहर, टाँकीलगायत विभिन्न जातका १७ हजार बिरुवा रोपेको सुवेदी बताउनु हुन्छ । बाख्राको रेखदेखका लागि एकजना कर्मचारी व्यवस्था गरिएको छ ।
जिल्ला कृषि विकास कार्यालय कास्कीको अनुदानमा १०० मिटर पाइप प्राप्त भएपछि खानेपानीको सुविधा पुगेको छ । त्यसअघि सहकारीको सक्रियतामा रामकोटदेखि बाख्रा फार्मसम्मको दुई किलोमिटर मोटर बाटो निर्माण गरिएको थियो ।
सो सहकारीले बाख्रासहित माछा पाल्ने उद्देश्यले १० हजार भुरा पाल्न सकिने पोखरी निर्माण गरेको छ । निकट भविष्यमा बङ्गुर र लोकल कुखुरासमेत पाल्ने उद्देश्य रहेको छ ।