उदयपुर र झापाका विद्यालयलाई भारतीय सहयोग

काठमाडौं । भारत सरकारले नेपालको उदयपुर जिल्ला जोगीदह गाविस स्थित श्री जनता उच्च माध्यमिक विद्यालयको विद्यालय भवन निर्माणको लागि ३ करोड ६१ लाख ५ हजार सहयोग गर्ने भएको छ ।

भारतीय राजदूतावास, काठमाडौं र उदयपुर जिल्लाविकास समिति तथा विद्यालयबीच सम्झौता भएको छ । सन् १९५९ मा प्राथमिक विद्यालयको रुपमा स्थापना भई २००८ मा उच्च माध्यमिक विद्यालयमा स्तरोन्नती गरिएको विद्यालय नेपालको पूर्वाञ्चल विकास क्षेत्र अन्तर्गत उदयपुर जिल्लाको जोगीदह गाविसमा रहेको छ ।

विद्यालयले उदयपुरका १५ गाविसहरुलाई समेट्द छ । विद्यालयमा आधा जसो छात्रा सहित १२०० भन्दा बढी विद्यार्थीहरुले अध्ययन गर्दछन् । यस परियोजनाको अतिरिक्त, भारत सरकारको ने.रु. २.९९ करोड सहयोगमा उदयपुर जिल्लामा एउटा परियोजनाको कार्य चालू रहेको र ने.रु. ५.१६ करोडको लागतमा पाँच वटा परियोजनाहरु सम्पन्न भैसकेका छन । भारतले उदयपुर जिल्लामा प्रयोग गर्ने गरि ८ वटा एम्वुलेन्सहरु प्रदान गरेको छ ।

अरनिको उमाविलाई ४ करोड सहयोग
भारतीय राजदूतावास, काठमाडौं र झापा जिल्ला विकास समिति तथा झापा महेशपुर स्थित श्री अरनिको उच्च माध्यमिक विद्यालय बीच श्री अरनिको उच्च माध्यमिक विद्यालयको लागि विद्यालय भवन निर्माणार्थ एक सम्झौता पत्रमा हस्ताक्षर भएको छ ।

परियोजना नेरु ४ करोड २१ लाख ४ हजारको लागतमा झापा जिल्ला विकास समितिद्वारा कार्यान्वयन गरिने जनाएको छ । भारत सरकारले नेपालको झापा जिल्ला महेशपुर स्थित श्री अरनिको उच्च माध्यमिक विद्यालयको विद्यालय भवन निर्माणको लागि भारत–नेपाल आर्थिक सहयोग कार्यक्रम अन्तर्गत सहयोग प्रदान गर्दैछ ।