तेल चोरी प्रकरणः पुनरावेदनद्वारा जिल्ला प्रशासनको आदेश बदर

रुपन्देही २१ भदौ । रुपन्देहीको मधौलिया–३ र पड्सरी–१ मा भएको पेट्रोलियम पदार्थ चोरी प्रकरणमा पुनरावेदन अदालत बुटवलले जिल्ला अदालत रुपन्देहीको आदेश सदर गरेको छ ।
सोही प्रकरणमा कालोबजारीअन्तर्गत जिल्ला प्रशासन कार्यालय रुपन्देहीबाट भएको धरौटीको आदेश बदर गर्दै आरोपीहरुलाई तारेखमा छाड्न पुनरावेदनले आदेश दिएको छ ।
पड्सरी र मधौलियामा भएको पेट्रोलियम पदार्थ चोरीको मुद्दामा जिल्ला अदालतले गत जेठ २० गते ट्याङ्कर चालक, ट्याङ्करधनी र आयल निगम भलवारीका तत्कालीन प्रमुखसहित–३ जनासँग धरौटी माग गरेको थियो । सहचालकलाई जिल्ला अदालतले साधारण तारेखको आदेश गरेको थियो । यसलाई पुनरावेदन अदालतले पनि सदर गरेको छ । तर कालोबजारीअन्तर्गत जिल्ला प्रशासनले गत असार ६ मा आयल निगमका कर्मचारीलाई धरौटी, ट्याङ्कर चालक र धनीलाई पुर्पक्षका लागि थुनामा र सहचालकहरुलाई दिएको साधारण तारेखको आदेश पुनरावेदनले बदर गरेको हो ।
“जिल्ला अदालत र जिल्ला प्रशासनको आदेश विरुद्ध आरोपितहरु पुनरावेदन गएका थिए । सरसर्ती बुझ्दा पुनरावेदनबाट जिल्ला अदालतको आदेश सदर भएको छ भने जिल्ला प्रशासनबाट कालोबजारीमा भएको आदेश बदर भएको छ”, पुनरावेदन अदालत बुटवलका रजिष्ट्रार पिताम्बर बर्माले भन्नुभयो । अदालतको यो आदेशसँगै अभियोगीहरु अदालतमा धरौटी बुझाएपछि तारेखमा बाहिर निस्कन पाउने छन् ।
जिल्ला अदालतले मधौलियाको तेलचोरी अभियोगमा दायर मुद्दाको आदेशमा ट्याङ्करधनी हरिबहादुर कुँवरबाट रु १६ लाख ४७ हजार ३६० र ट्याङ्कर चालक शिवकुमार चौधरीसँग रु १६ लाख ४७ हजार ३६० धरौटी माग गरेको थियो ।
त्यस्तै निगमका Ôेत्रीय प्रबन्धक नागेन्द्रप्रसाद कुर्मी, अधिकृतद्वय रवीन्द्रकुमार राउत र दीपेन्द्र बस्नेतबाट जनही रु चार लाखका दरले रु १२ लाखको धरौटी माग गरिएको थियो । अन्य ट्याङ्कर चालक रामचन्द्र चौधरीसँग रु दुई लाख दुई हजार ६४० र सुदिप कार्कीसँग रु ९३ हजार ६०० धरौटी माग गरिएको थियो ।
ट्याङ्कर सहचालक मोहन कँडेल, प्रकाश महत, राजन रायमाझी, पद्मबहादुर थापा, राजन चौधरीलाई साधारण तारेखको आदेश अदालतले दिएको छ । यस्तै पड्सरीमा भएको पेट्रोलियम पदार्थमा चोरीमा पक्राउ परेका १९ जनामध्ये १२ जना अभियुक्तबाट रु एक करोड ३२ लाख ७२ हजार ४९२ धरौटी बुझाउन आदेश भएको छ ।
भारतको बैतालपुरबाट नेपाल आयल निगमको भलवारीस्थित पश्चिमाञ्चल डिपोमा ल्याइने पेट्रोलियम पदार्थ निगममा नपुर्याई बीचमै रुपन्देहीको पड्सरी र मधौलियामा निर्मित भूमिगत पम्पमा पेट्रोलियम पदार्थ चोरी गर्ने क्रममा वैशाख १६ गते रुपन्देही प्रहरी र राष्ट्रिय सतर्कता केन्द्रले छापा मारेर १९ वटा ट्याङ्कर नियन्त्रणमा लिएका थिए । यस प्रकरणमा प्रहरीले कुल ५७ जनामाथि जिल्ला सरकारी वकिलको कार्यालयमार्फत् बिगो माग दाबीसहित मुद्दा दायर गरेको थियो । यसमध्ये २७ जना पक्राउ परेका छन् भने बाँकी फरार छन् ।
रुपन्देही प्रहरीले पेट्रोलियम पदार्थ चोरीको अभियोगमा नेपाल उद्योग वाणिज्य महासङ्घका केन्द्रीय सदस्य चोपनारायण श्रेष्ठ, पश्चिमाञ्चल ट्याङ्कर व्यवसायी सङ्घका अध्यÔ राकेशकुमार कसौधन र वरिष्ठ उपाध्यÔ बालकृष्ण गैरे, ट्याङ्करधनीहरु दयाशङ्कर कसौधन, प्रेमराज गैरे, विनोद उप्रेती, पशुपतिनाथ कसौधन, लप्पु चौधरी, विकाश Ôेत्री, रामचन्द्र अधिकारी, श्रवणकुमार श्रेष्ठ, रुद्र शर्मा, प्रिति जयसवाल, पिङ्की कलवार जयसवाल र पप्पुकुमार कसौधनलाई वैशाख १९ मा पक्राउपुर्जी जारी गरी खोजी गरिरहेको छ । पक्राउपुर्जी जारी भएकाहरु बुटवल तथा भैरहवा आसपासमा रहे पनि प्रहरीले पक्राउ गरेको छैन ।