भारतको ६८ औं स्वतन्त्रता दिवसको अवसरमा नेपाललाई एम्बुलेन्स, बस उपहार

काठमाडौं, ३०, साउन । भारतको ६८ औं स्वतन्त्रता दिवसको अवसरमा भारत सरकारद्वारा नेपालका १९ जिल्लाहरुका विभिन्न अस्पतालहरु, परोपकारी संस्थाहरु तथा शैक्षिक संस्थाहरुलाई २० वटा एम्बुलेन्सहरु र ४ वटा बसहरु उपहार स्वरुप प्रदान गरिएको छ ।
स्वतन्त्रता दिवसको अवसरमा आज (शुत्रबार) राजदूतावास परिसरमा आयोजित सार्वजनिक कार्यक्रममा भारतका राजदूत रणजीत रायले राष्ट्रिय झण्डा फहराई भारतका राष्ट्रपतिले १४ अगष्टमा राष्ट्रका नाममा दिएको सन्देश पढेर सुनाएका थिए । उक्त सन्देशमा अन्य कुराहरुको अतिरिक्त शान्ति, स्थायित्व र छिमेकको विकासलाई जोड दिइएको थियो ।
राजदूतले १८ जिल्लाका उपहार प्राप्त गर्ने संस्थाहरुलाई १९ वटा एम्बुलेन्सहरु र ४ बसहरु उपहार स्वरुप प्रदान गरे । बाँकी १ एम्बुलेन्स वीरगञ्जस्थित भारतीय महावाणिज्यदूतले वीरगञ्ज महावाणिज्यदूतावासको क्षेत्र अन्तर्गत पर्ने संस्थाहरुलाई उपहार स्वरुप प्रदान गरेका थिए । समारोहमा राजदूतले नेपालका केही दुर्गम जिल्लाहरु लगायत विभिन्न स्थानमा रहेका ७५ वटा पुस्तकालय, शैक्षिक तथा तालिम प्रतिष्ठानहरुलाई पुस्तकहरु समेत उपहार स्वरुप प्रदान गरे ।
भारतले सन् १९९४ देखि नेपालको ७३ जिल्लाहरुमा अवस्थित विभिन्न संस्थाहरुलाई ४ सय ४२ वटा एम्बुलेन्सहरु प्रदान गरिसकेको छ । यसले स्वास्थ्य सेवाको पहँुच भन्दा टाढा रहेका हजारौं मानिसलाई उनीहरुको घरदैलोसम्म स्वास्थ्य सेवा पुर्याउन सहयोग पुगेको जनाएको छ । भारतले नेपालका २४ जिल्लाहरुमा रहेका विभिन्न शैक्षिक तथा कल्याणकारी संस्थाहरुका हजारौं विद्यार्थीहरुको विद्यालयमा सहज पहुँचको लागि ८६ वटा बसहरु उपहार स्वरुप प्रदान गरिसकेको छ ।