भारतीय प्रधानमन्त्री मोदीसँग उद्योगी व्यवसायीको भेट

काठमाडौँ, १९ साउन । भारतीय प्रधानमन्त्री नरेन्द्र मोदीसँग निजी क्षेत्रको छाता संस्था नेपाल उद्योग वाणिज्य महासङ्घ, नेपाल उद्योग परिसङ्घ र नेपाल चेम्बर्स अफ कमर्सका प्रतिनिधिले आज भेट गरेका छन् ।
महासङ्घका अध्यक्ष प्रदीपजङ्ग पाण्डे, उद्योग परिसङ्घका अध्यक्ष नरेन्द्र बस्न्यात र नेपाल चेम्बर्स अफ कमर्सका अध्यक्ष राजेशकाजी श्रेष्ठसहित विनोद चौधरी, भवानी राणा, पद्म ज्योति, उपेन्द्र महतो, सुरज वैद्यलगायतका नेपालका प्रतिष्ठित उद्योगी तथा व्यापारीले उहाँसँग करिब १५ मिनेट भेट गर्नुभएको थियो ।
हिजो व्यवस्थापिका–संसद्मा गर्नुभएको सम्बोधन र भारतीय प्रधानमन्त्रीको सम्मानमा प्रधानमन्त्री सुशील कोइरालाले दिनुभएको रात्रि भोजमा प्रधानमन्त्री मोदीले दिनुभएको मन्तव्यले नेपालको निजी क्षेत्र अत्यन्त उत्साहित भएको भेटपछि सञ्चारकर्मीलाई महासङ्घका अध्यक्ष पाण्डेले बताउनुभयो ।
आर्थिक समृद्धिका लागि नयाँ ढोका खुला भएको उल्लेख गर्दै उहाँले अब मुलुकमा थप लगानी भित्रिने विश्वास लिइएको बताउनुभयो । जलस्रोतको उपयोगका निम्ति भारतीय प्रधानमन्त्री मोदीले अघि सार्नुभएको भावी योजनालाई कार्यान्वयन ल्याउन महासङ्घले आफ्नो तर्फबाट आजैदेखि काम थाल्ने उहाँले प्रतिबद्धता व्यक्त गर्नुभयो ।
नेपाल–भारतबीचको व्यापार घाटालाई न्यून गर्न मोदीको भ्रमण फलदायी एवम् उपलब्धिमूलक भएको अध्यक्ष पाण्डेको प्रतिक्रिया थियो ।