महिला सहकारीबाट तीन करोड बचत सङ्कलन

पर्सा, २८ असार । महिला सहकारी संस्थाबाट पर्सामा करिब रु तीन करोड बचत रकम सङ्कलन भएको छ ।
महिलाले सङ्कलन गरेर रकम विभिन्न आयमूलक कार्यमा लगानी पनि गरिएको छ । महिला तथा बालबालिका कार्यालय पर्साका अनुसार जिल्लामा हालसम्म २५ वटा महिला सहकारी संस्था क्रियाशील रहेका छन् ।
प्रत्येक सहकारी संस्थामा अध्यक्षदेखि पदाधिकारी र सेयर धनी पनि महिला नै रहेको महिला तथा बालबालिका कार्यालय पर्साकी प्रमुख उमा श्रेष्ठले जानकारी दिनुभयो । उहाँले जिल्लामा हाल क्रियाशील रहेका महिला सहकारी संस्थामा ५० हजार महिला आबद्ध रहेको जानकारी दिए ।
पच्चीसवटा सहकारीले हालसम्म रु दुई करोड ३४ लाख ६४ हजार २०८ बचत रकम सञ्चालन गरेको र उनीहरूले आफूहरूले सङ्कलन गरेको रकम आयआर्जन र सीपमूलक कार्यमा लगानी गर्ने गरेको महिला तथा बालबालिका कार्यालय पर्साकी सुपरभाइजर सुनिता प्रसार्इंले जानकारी दिए  ।
महिला विकास कार्यालयले पनि महिलालाई हालसम्म करिब रु १० लाख अनुदान स्वरूप रकम प्रदान गरिसकेको महिला तथा बालबालिका कार्यालय पर्साकी महिला कार्यकर्ता सीता अर्यालले जानकारी दिए । पर्सामा महिला विकास कार्यक्रम जिल्लाको सबै ८२ वटै गाविसमा लागू भएको र आगामी आर्थिक वर्षदेखि कार्यक्रमलाई अझै प्रभावकारी बनाउने लक्ष्य रहेको कार्यालयकी प्रमुख श्रेष्ठले  बताइन ।