नियम नमान्ने जुम्लाका आठवटा सहकारी खारेज

जुम्ला १८ बैशाख / डिभिजन सहकारी कार्यालय जुम्लाले आठवटा सहरकारी संस्था खारेज गरेको छ । सहकारीको मापदण्ड पूरा नगर्ने जुम्लाका ६ र मुगु जिल्लाका दुईटा सहकारी संस्था खारेज गरेको हो । सहकारी मापदण्ड २०६८ मा भएको व्यवस्थाअनुसार खारेज गरिएको निमित्त कार्यालय प्रमुख टेकहादुर बुढाथापाले बताए ।
 
 
 
लगातार दुई आर्थिक वर्षको लेखापरीक्षण नगर्ने, साधारणसभा नगर्ने सहकारीलाई सहकारी ऐन, २०४८ र नियमावली २०४९ अनुसार खारेज गरिएको डिभिजन सहकारी कार्यालय जुम्लाले जनाएको छ । यस्तै मासिक प्रगति प्रतिवेदन पेश नगर्ने सहकारीलाई खारेज गरिएको बुढाथापाले बताउनुभयो । मुगु जिल्लाका खेस्मा मालिका सहकारी संस्था र कालिका सहकारी संस्थालाई खारेज गरिएको उनले बताए ।
 
 
 
यस्तै जुम्लाका बहुउद्देस्यीय स्वावलम्बन सहकारी संस्था बुम्रमाडिचौर, भगवती सहकारी संस्था कुडारी र घोडेमहादेव गाविसमा रहेको महादेव स्वावलम्बन सहकारी संस्था खारेज भएको कार्यालयले जनाएको छ । यसैगरी, बहुउद्देश्यीय सहकारी संस्था घोडेसिम, सूर्यमुखी बचत तथा ऋण सहकारी संस्था देपालगाउँ, महावैपाथरखोला गाविसमा रहेको देवीजागरण बचत तथा ऋण सहकारी संस्था खारेज भएको बुढाथापाले बताए।
 
 
 
यसैबीच, ६ वटा सहकारी संस्था खारेजीको प्रक्रियामा रहेको कार्यालयले जनाएको छ । साधारणसभा सम्पन्न नगरेका, वार्षिक र मासिक प्रगति प्रतिवेदन पेश नगरेका सहकारी ६ वटा सहकारी संस्था खारेजीको प्रक्रियामा रहेको निमित्त प्रमुख बुढाथापाले बताउनुभयो ।