सहकारीको भूमिकालाई प्रभावकारी बनाउनु पर्ने

बागलुङ, १५ बैशाख । बागलुङका प्रमुख जिल्ला अधिकारी बलदेव गौतमले मुलुकको आर्थिक, सामाजिक रुपान्तरणका लागि सहकारीको भूमिकालाई प्रभावकारी बनाउनु पर्ने बताएका छन् ।

जिल्ला सहकारी संघ लिमिटेड बागलुङको सातौ स्थापना दिवसका अवसरमा शनिवार धौलागिरि अञ्चल अस्पतालका विरामीहरुलाई दुध तथा फलफूल वितरण कार्यक्रममा बोल्दै उजले सो कुरा बताएका हुन् । सहकारीहरुलाई व्यवस्थित गराउन सबै पक्षको सहयोग, समन्वय र सहकार्य आवश्यक रहेको भन्दै उनले जिल्ला सहकारी संघले सबैलाई आवद्ध बनाएर यसको मर्म अनुसार अगाडि बढ्न प्रेरणा दिनु पर्ने बताए । संघको स्थापना दिवसका अवसरमा प्रमुख जिल्ला अधिकारी बलदेव गौतम, अस्पतालका निमित्त प्रमुख डा. श्रीकृष्ण भट्ट, नेपाल सूचना तथा सञ्चार केन्द्रीय सहकारी संघका उपाध्यक्ष मनकुमारी केसी, नेपाल पत्रकार महासंघ बागलुङका अध्यक्ष मुकेशचन्द्र राजभण्डारी, डिभिजन सहकारी कार्यालयका सहकारी निरिक्षक डिलबहादुर केसी लगायतले विरामीहरुलाई दुध र फलफूल वितरण गरेका थिए ।

२०६५ साल बैशाख १३ गते डिभिजन सहकारी कार्यालयमा दर्ता भएर सञ्चालनमा आएको जिल्ला सहकारी संघमा हाल ८५ वटा सहकारी संघ संस्थाहरु आवद्ध रहेको, १० लाख भन्दा बढी लगानी रहेको संघले जनाएको छ । संघले सहकारी सम्बन्धी शिक्षा, तालिम लगायत सहकारी प्रवद्र्धनका लागि सचेतनामुलक कार्यक्रम गर्दै आइरहेको छ ।