सहकारी मैत्री संविधान बनाउन सक्दो प्रयास गर्छु : मानन्धर

काठमाडौं, २७ पुस। संविधान सभाका सदस्य रामबीर मानन्धरले नयाँ बन्ने संविधान सहकारी मैत्री बनाउन आफूले सक्दो प्रयास गर्ने बताएका छन् ।

नयाँबजार स्थित अभयपुर बचत तथा ऋण सहकारी संस्थाको चौथौ साधारणसभामा बोल्दै मानन्धरले सहकारी देशको आर्थिक मेरुदण्ड भएकाले यसको विकासमा आफूलागि पर्ने बताए । त्यस्तै सहकारीहरुमा आर्थिक पारदर्शीता र शुसासनको कमी भएको बताउँदै त्यस तर्फ सचेत हुन पर्ने उनको भनाई थियो ।

संस्थाका अध्यक्ष मेघनाथ न्यौपानेले संस्थाले छोटो समयमै उल्लेख्य प्रगती गर्न सफल भएको बताए । २५ जनाबाट शुरु गरेको यस संस्थामा हाल ५ सय २८ जना रहेका छन् । संस्थाको शेयरपुँजी ४१ लाख ६८ हजार ८ सय ५० रहेको छ ।

संथाले आर्थिक वर्ष २०६९/७० मा १ करोड ९ लाख ३७ हजार २४ रुपैंया निक्षेप संकलन गरी १ करोड २४ लाख ९५ हजार ७ सय ५१ कर्जा प्रवाह गर्न सफल भएको सभामा जानकारी गराइएको थियो ।