विजय शान्ति सहकारी पुँजी बढाउँदै

काठमाडौँ, २२ पुस । विजय शान्ति बचत तथा ऋण सहकारी लि, मरुटोलले आर्थिक वर्ष २०६९÷७० मा रु एक लाख २१ हजार ४६ खुद मुनाफा आर्जन गरेको छ ।

शनिबार सम्पन्न साधारणसभामा संस्थाका अध्यक्ष जयन्द्रमान सिंह बनियाले चालु आवमा चुक्ता पुँजी वृद्धि गर्न ५० प्रतिशत हकप्रद सेयर जारी गर्ने विशेष प्रस्ताव राख्नुभएको थियो र यसलाई सर्वसम्मतिबाट पारित गरिएको थियो ।

गत वर्षको साधारणसभामा घोषणा गरिए मुताबिक संस्थाले चुक्ता पुँजीमा १० प्रतिशतले वृद्धि गरिसकेको छ । संस्थाको निक्षेप बचत रु पाँच करोड २४ लाख, कर्जा सापटी रु चार करोड ३५ लाख र लगानी रु एक करोड ४२ लाख रहेको छ ।

विसं २०६५ कात्तिक महिनादेखि सञ्चालनमा आएको यो सहकारीको ५७ जना सेयरधनी रहेका छन् ।