पाँच तारा सहकारीको १६ औं साधारण सभा सम्पन्न, १५ प्रतिशत लाभांश दिने
काठमाडौं : पाँच तारा बचत तथा ऋण सहकारी संस्थाको १६औं साधारणसभा सम्पन्न भएको छ । संस्थाले साधारणसभालाई प्रभावकारी बनाउन र सदस्यहरुलाई अधिकतम छलफलमा सहभागी बनाउन सभाको मोडालिटीलाई फरक बनाएको छ । संस्थाले यस पटक अतिथि र खादामाला रहित साधारण सभा गरेको हो ।
साधारण सभाको उद्घाटन सत्रमा नै लामो समय लाग्ने र दोश्रो सत्रमा सदस्यहरुको उपस्थिति न्यून रहने हुँदा संस्थाले यस वर्षदेखि साधारण सभाको मोडालिटी परिवर्तन गरेको जनाएको छ । सभाको उद्घाटन संस्थाका अध्यक्ष भोला नाथ पाठकले गरेको थिए ।
संस्थाका अध्यक्ष पाठकले वार्षिक प्रतिवेदन प्रस्तुत गर्दै सभालाई सरल र कम खर्चिलो बनाउने उदेश्यका साथ नियमनकारी निकायको निर्देशनलाई समेत पालना गर्दै गत बर्षदेखि सदस्यहरुको माझमा मात्र विभिन्न एजेन्डाहरु माथी वृहत छलफल गरी साधारण सभा गर्ने गरेको बताए । हरेक नेपालीमा स्वदेशी वस्तुको उत्पादन र प्रयोगमा देशव्यापी बनाउन सके मुलकबाट हरेक कुरामा परनिर्भरताको अन्त्य हुने उनको भनाई छ । यसका लागि कृषिजन्य तथा उपभोग्य वस्तुको उत्पादन बढाउन आवश्यक रहेको पाठकले बताए । सहकारी ऐनले बचत तथा ऋण सहकारी संस्थालाई उत्पादनशिल क्षेत्रमा लगानी गर्न बन्देज गरेकाले जगेडा लगायतका अन्य कोषलाई उत्पादनशिल क्षेत्रमा परिचालन गर्न नपाएको उनको भनाई छ । २५ वटा संस्था मिलेर व्यवसाय गर्न त्यति सहज नभएको भन्दै उनले कोषको सामाथ्र्य हेरी ५ वटासम्म संस्थालाई व्यवसायिक कार्य गर्न सक्ने गरी सहजिकरण गर्न उनको माग छ ।
सहकारी, सदस्य र सरकारको सहभागिता रहने गरी उत्पादनमा जान सके सहरको पुँजी गाँउसम्म पुग्ने र सहरमा नै रहेका सरकारी खाली जग्गामा पनि उत्पादन गर्न सकिने उनको भनाई छ । संस्थाले विगत २ बर्ष देखि सदस्यहरुलाई उद्यमशिल बनाउन र संस्थागत रुपमा पनि उद्यमशिलतता विकासको लागि उद्यम खाता सञ्चालनमा ल्याएको र उक्त खातामा ४५० सदस्यको सहभागिता रहेको उनले जानकारी दिए । उद्यमशिलताबाटै व्यक्ति र देशको आर्थिक अवस्था मजवुद बनाउन सकिने भएकाले सदस्यहरुलाई संस्थाबाट ऋण लिएर उद्यमी बन्न पाठकले आग्रह गरे ।
सदस्यहरुलाई क्षणिक ब्याजको प्रलोभनमा परेर आफ्नो संस्थामा कारोबार नछोड्न आग्रह गर्दै उनले जुनसुकै संस्थामा कारोबार नगर्न पनि सुझाव दिए ।
संस्थाले गत आर्थिक वर्षको असार मसान्तसम्म ८ करोड ११ लाख शेयरपुँजी, ५ करोड ८६ लाख साधारण जगेडा कोष र ५२ करोड ५३ लाख ७९ हजार बचत संकलन गरी ६५ करोड ५६ लाख २३ हजार ऋण लगानी गरेको छ । संस्थाले गत आ.व.मा खुद नाफा १ करोड २२ लाख २५ हजार गरेको छ । सभाले शेयर लाभांश र संरक्षित पुँजी फिर्ता कोषबाट समेत गरी सदस्यलाई १५ प्रतिशत लाभांश दिने प्रस्तावलाई पारित गरेको छ । संस्थामा २११४ सदस्य आवद्ध रहेका छन् ।
संस्थामा आवद्ध कुल सदस्यमध्ये १५२० जनाले मासिक बचत गर्दै आएका छन् । मुलुकको आएको वित्तीय संकटका कारण संस्थाले गरेको ऋण लगानीको साँवाब्याज समयमा नआउँदा गत वर्षको तुलनामा नाफामा केहि कमी आएको अध्यक्ष पाठकले बताए । सभामा ७५ बर्ष माथीका ज्येष्ठ सदस्यहरुलाई २ हजारका दरले दशैं भत्ता उपलब्ध गराइएको थियो ।
कोषाध्यक्ष कुमार विमलीले आर्थिक वर्ष २०७९/८० को आर्थिक प्रतिवेदन र लेखा सुपरीवेक्षण समितिका संयोजक सुशीला प्रसाईंले लेखा समितिको प्रतिवेदन सभामा प्रस्तुत गरेका थिए । सभामा प्रस्तुत विभिन्न ११ वटा प्रस्तावलाई सर्वसम्मतले अनुमोदन गरी पारित गरेको छ ।