नेतृत्वको अकर्मण्यताका कारण ‘वरिष्ठ उपाध्यक्ष’ को अनुभूति पाइनँ

नेफ्स्कूनमा बरिष्ठ उपाध्यक्षको रुपमा तपाईको चार वर्ष कस्तो रह्यो ?
४ वर्षे कार्यकालको अन्तिम साधारण सभा आउन केही दिन मात्रै बाँकी छ । नेफ्स्कूनको ब्यालेन्स सिटको अवस्था के हो भन्ने कुरामा म अपडेट छैन । विभिन्न संस्थाका साथीहरुले सोध्नु हुन्छ, ‘यस पटक नेफ्स्कूनले कति प्रतिशत लाभांश दिँदै छ ?’ हामी लाभांश दिँदै छौं की थप भार बोकाउँदै छौं भन्ने कुरामा म क्लियर छैन । वर्तमान नेतृत्वले सुरुवातमै गरेको उत्साहपूर्ण निर्णय कार्यान्वयको अवस्था राम्रो छैन । मिरा ईआरपीको डेडलाइन अघिल्लो कात्र्तिक मै सकिएको हो तर अहिले के भईरहेको छ भनेर जवाफ दिन सक्ने अवस्थामा छैन । प्राविधिक साथीलाई सोध्नुपर्छ भनेर मैले भन्नुपर्ने अवस्था छ । भवनको संयोजक मै हुँ तर कुनै आकार लिन सकेको अवस्था छैन । हामीले सुरुवात गरेको कुनै पनि संरचनाले नतिजा ल्याउन सकिएको छैन । स्थिरीकरण कोषको पनि संयोजक मै हुँ । स्थापना त भयो तर दुःख परेको बेलामा साथ पाउन सकिएन भनेर धेरैले गुनासो गर्नुहुन्छ । धेरै विषय निर्णय गरिएको छ तर कार्यान्वयन भएको छैन । यी कुराहरु कार्यान्वयन नगरी नेफ्स्कूनबाट बाहिरिदा त्यति राम्रो सन्देश जाँदैन । निर्णय कार्यान्वयन गर्नको लागि पनि नेतृत्वमा आउनै पर्ने बाध्यात्मक परिस्थिति छ ।

नेफ्स्कून सञ्चालक समितिले गरेका निर्णय कार्यान्वयन भएन भन्नुभयो । तपाई वरिष्ठ उपाध्यक्ष हुनुहुन्छ कार्यान्वयन गर्न नसक्नु नपाईको पनि कमजोरी होइन र ?
नेतृत्व फस्ट म्यान रहेछ । नेतृत्व सुरुदेखि नै हामीले संस्थाहरुप्रति प्रतिवद्ध पाएनौं । म आज वरिष्ठ उपाध्यक्ष छु तर अध्यक्षलाई खोज्दा कहिल्यै पाइनँ । सहकारीको विषयमा छलफल गर्ने फुर्सद उहाँलाई छैन । नेफस्कूनभित्र विभिन्न उपसमिति बनेका छन् । उपसमितिले दिएको रिर्पोट कार्यान्वयन गराउन नेतृत्वले सकेन । नेतृत्व सहकारी र सुशासनमा पूर्ण प्रतिवद्ध नहुँदा यो समस्या देखिएको हो । मुख्यतः नेतृत्वको अकर्मण्यताले गर्दा पछिल्लो चार वर्ष वरिष्ठ उपाध्यक्षको समेत अनुभूति गर्न पाइनँ । संस्थागत निर्णय गराउने सन्दर्भमा धेरै पटक म मौन बसेँ । नेतृत्वको निर्णयलाई कहिल्यै कमजोर हुन दिइनँ । त्यसको फाइदा व्यक्तिगत स्वार्थमा रुपान्तरण गरेर संघको साधारण सभालाई अनावश्यक रुपमा चुनावी साधारण सभाको रुपमा धकेल्ने प्रयास भएको छ ।

तपाईले नेफ्स्कूनको अध्यक्ष पदमा उम्मेदवारी घोषणा गरिसक्नु भएको छ । सदस्यहरुको प्रारम्भिक प्रतिक्रिया के कस्तो छ ?
विगत तीन महिनादेखि नै अध्यक्ष पदको लागि तयारी छु । विभिन्न जिल्लाहरुमा उपस्थित जनाएको छु । जिल्लाका साथीहरुको आग्रह अनुसार नै अध्यक्ष पदको लागि तयार भएको हो । अहिलेको नेतृत्वबाट अपेक्षाकृत उपलब्धि नभएको र ‘अबको नेतृत्वमा तपाई आउनुपर्छ’ भनेपछि अध्यक्षको लागि तयार भएको हुँ । सर्वसम्बत अध्यक्ष बनाउन पनि प्रतिनिधिहरु तयार हुनुहुन्छ । तर, त्यस्तो नभएको अवस्थामा प्रकृयाबाटै अध्यक्ष बनाउने प्रतिवद्धता धेरै साथीहरुले व्यक्त गर्नुभएको छ । म अब नेतृत्वबाट पछि हट्ने अवस्था छैन ।

तपाईको पक्षमा सर्वसम्वत नेतृत्व चयन हुने वातावरण खासै देखिँदैन । त्यस्तो अवस्थामा निर्वाचनमै जानुहुन्छ ?
विगतमा पनि निर्वाचन नै भएको हो । राष्ट्रिय सहकारी बैंक, राष्ट्रिय सहकारी महासंघ, विषयगत केन्द्रीय संघ, प्रदेश संघ, जिल्ला तहसम्ममा निर्वाचन गराउन हुँदैन भनेर अग्रपक्तिमा उभिने मै थिएँ । धेरै साथीहरुले भन्दा पनि नमानेर सहकारी भित्रका स्वस्थ नेतृत्व बनाउन धेरै गृहकार्य गरेको हो । निर्वाचन प्रकृयाबाट मात्रै अध्यक्ष बन्नु पर्छ भन्ने लागेको छैन । अझै पनि समय छ । अग्रजहरुले सर्वसम्वत अध्यक्ष बनाउनु हुन्छ भन्ने विश्वास अझै छ । यदि, भएन भने नेतृत्वमा जान पछाडि फर्कनु हुँदैन । यदि मैले त्यसो गरे भने सोचे जस्तो अभियान सहज हुँदैन ।

तपाईले नेतृत्व गर्दा नेफ्स्कूनमा कायापलट हुने हो र ?
नेतृत्वमा जाने अवसर मागेको छु । नेतृत्वमा गएर यही कुरालाई सम्बोधन गरेरै जाने छु । अहिलेपनि यही कुरालाई सम्बोधन गर्दै आएको छु । नेफ्स्कूनमा २४ वर्ष काम गरेको अनुभवका आधारमा कुशलतापूर्वक जिम्मेवारी निर्वाह गरेको छु । नेतृत्वमा बसेपछि काम गर्ने समय, प्रतिवद्धता प्रमुख कुरा हो । यी सबै कुराको अनुभव म सँग छ । राम्रो गर्नकै लागि नेतृत्वमा आउन खोजेको हो ।

तपाईका योजना र प्रतिवद्धताहरु के के छन् ?
नेतृत्वमा आउनेले संस्थाप्रति प्रतिवद्धतासहित पूर्णकालीन समय दिन आवश्यक छ । यो दुबै म भित्र पाउनु हुन्छ । जुन उद्देश्यका लागि नेतृत्वमा बसेको हो, त्यसलाई न्याय दिन सक्नुपर्छ । नेफ्स्कूनको नेतृत्वमा बस्नेले मुलुकभरको साकोस अभियानको अध्यक्ष हुँ भनेर काम गर्नुप¥यो । तर, त्यो अहिलेको नेतृत्वमा पाइएन । यी दुवै कुरामा पर्फेक्ट भएकै कारण साथीहरुको सर्पोट छ । यो अभियानमा काम गर्ने हो । सहकारी अभियानको दिगोपनाको लागि काम गर्ने हो । हामीलाई थाहा छ आज बचत तथा ऋण सहकारी अभियान वित्तीय सहकारी ऐन पर्खेर बसेको छ । स्तरीय स्वःनियमन सुनिश्चित गर्ने अभियानकै सुपरिवेक्षण खोजेको छ । संघमा आवद्ध सबैले क्षमता विकासका कार्यक्रमहरुको अपेक्षा केन्द्रीय संघसँग राखेको छ । संख्या घटाउने नाममा होइन सेवा र सञ्चालन स्तरीयताका लागि एकिकरण अभियान स्वीकार गरी अघि बढ्न आतुर छ । नेफ्स्कूनको आफ्नै भवन, कार्यालय वा अन्य व्यवस्था भन्दा आज अभियानले केन्द्रीय संघको संरक्षण खोजेको छ । खुलेर आफ्नो भन्न सकिने केन्द्रीय संघ अभियानलाई चाहिएको छ जसले राज्यसँग अभियानको समस्यामा पैरवी गरी समाधान दिन सकोस् । पदमा रहे पनि नरहे पनि अभियानका सबै समस्या समाधानमा सहकार्य गर्न प्रतिबद्ध छु ।