गैंडाकोट, ११ बैशाख
‘हाम्रो लक्ष्य, खुशी एवं स्वस्थ सदस्य’ भन्ने आदर्श मार्ग दर्शन अनुसार वित्तिय साक्षरता, स्वास्थ्य साक्षरता र प्रविधि साक्षरतालाई अवलम्बन गर्दै आएको विकू बचत तथा ऋण सहकारी संस्थाले नियमित प्रदान गर्दै आईरहेको ‘विकू दिर्घकालिन छात्रवृति’ वितरण गरेको छ ।

विजय विकास स्रोत केन्द्रको सभाहलमा एक कार्यक्रमको बीच संस्थाले सदस्यका छोराछोरीलाई कार्यक्रममा ‘विकू दिर्घकालिन छात्रवृति’ वितरण गरेको हो । कार्यक्षेत्र भित्र रहेका संस्थाका विपन्न सेयर सदस्यका छोराछोरीलाई पोशाक, झोला, जुत्ता, मोजा, कपि, कलम, ज्यामिट्री बक्स, क्यालकुलेटर, रजिष्ट्रर लगायतका सामग्री प्रदान गरिएको संस्थाका क्षेत्रिय प्रमुख पूर्णप्रसाद सापकोटाले जानकारी दिए ।

जिल्लाका २५ वटा सामुदायिक विद्यालयका ४० जना विद्यार्थीलाई १ वर्षभरि लाग्ने विद्यालय शुल्क सहितको सो सामग्री प्रदान गरिएको उनले जानकारी दिए । उनका अनुसार १ देखि ४ कक्षा सम्मका ११ जना, ५ देखि ७ कक्षा सम्मका १९ जना र ८ देखि १० कक्षा सम्मका १० जना गरी ४० जनालाई छात्रवृति प्रदान गरिएको हो ।
कार्यक्रममा विकू बचत तथा ऋण सहकारी संस्थाका अध्यक्ष केशवप्रसाद सापकोटाले कठोर तपस्या र मेहनतले सफलता प्राप्त हुने जनाउँदै विद्यार्थीलाई मेहनत र सहयोगी भावनको विकास गर्न आग्रह गरे । विकूको हालको स्थान सोही तपस्या र मेहनतले बनेको उनको भनाई थियो । साथै उनले सदस्य हितका कार्यक्रम ल्याएको जनाउँदै आगामी दिनमा कल सेन्टर लगायतका नयाँ कार्यक्रम तय गरिएको बताए ।

मध्यविन्दु नगरपालिकाका नगर प्रमुख चन्द्रबहादुर राना, देवचुली नगरपालिकाका नगर प्रमुख पूर्णकुमार श्रेष्ठले पनि मन्तव्य राखेका थिए ।

२०४८ सालमा २६ जना सदस्यले १३ रुपैंयाको पुँजीबाट शुरु गरेको विकू सहकारीमा हाल ४ अर्बको पुँजी रहेको छ भने ५५ हजार सेयर सदस्य रहेका छन् । ४ पटकसम्म एक्सेस ब्रान्ड प्राप्त गर्न सफल सहकारीले जिल्लामा १२ वटा सेवा केन्द्रमार्फत अत्याधुनिक प्रविधिको प्रयोग गर्दै वित्तिय तथा गैरवित्तिय सेवा प्रदान गर्दै आईरहेको छ ।