१७ श्रावण २०७८, आईतवार

सकस, सफलता अनि स्थायित्वको साधार (प्रकाशकीय)

१९ चैत्र २०७७, बिहीबार
सकस, सफलता अनि स्थायित्वको साधार (प्रकाशकीय)

नेचुरल मिडियाद्वारा सञ्चालित सहकारीखबर डटकम आजबाट औपचारिक रुपमा ९औं वर्ष प्रवेश गरेको छ । संविधानतः आर्थिक उन्नतिको महत्वपूर्ण खम्बा स्थापित सहकारी क्षेत्रमा निष्पक्ष र व्यावसायिक पत्रकारिताको स्वतन्त्र र बिशिष्ट अभ्यासको उद्देश्यसहित न्यू मिडियाको रुपमा सहकारीखबरको पर्दापण भएको समादरणीय पाठक र दर्शकहरुलाई अवगत नै छ । आज गर्वका साथ भन्न सक्छौं हाम्रो उपस्थिति सहकारी क्षेत्रका सकारात्मक गतिविधिहरुको प्रचारप्रसार र कमीकमजोरीहरु औल्याउने काममा सन्तुलित र न्यायपूर्ण रहेको छ । प्रमाण यसको बढ्दो लोकप्रियता, विश्वसनीयता र प्रभावकारीता सिवाय अरु केही होइन । मूलधारका सञ्चारमाध्यममा नअटाएका अनि ओझेलमा परेका सहकारी गतिविधिहरु हाम्रा महत्वपूर्ण खुराक हुन् । सहकारीमार्फत समाज रुपान्तरण सम्भव छ, सदस्य र समुदायसँगै समग्र मुुलुकको विकास सम्भव छ तर यसको पूर्व सर्त सुशासन, पारदर्शिता, सदस्य केन्द्रीयता र निष्पक्षता अनि विवेकपूर्ण प्रजातान्त्रिक आचरण र अभ्यास हो भन्नेमा दुई मत छैन । यस अर्थमा सहकारी र पत्रकारिताबीच समानताका सम्बन्धहरु छन् । २१ औं शताब्दीको पत्रकारिताले पनि हिजो भन्दा बढी विवेक, सुशासन र पारदर्शिता अनि प्रजातन्त्रको माग गर्दछ । सहकारीखबर यस विषयमा बढी नै सचेत रहेको अवगत गराउन चाहन्छ ।

सहकारीखबर डटकमले अनलाइन मिडियामार्फत सहकारी क्षेत्रमा देखिएका विकृति–विसंगति, त्यस क्षेत्रमा प्राप्त सफलता, सफलताका कथा, उत्प्रेरणाका कथा, राज्यलाई गरेको योगदान, नीतिगत क्षेत्रमा देखिएका कमजोरी र सुधारका पक्ष लगायत गहकिला विषय उठान गर्दै आएका छौँ । सहकारी क्षत्रको सर्वाधिक लोकप्रिय मिडिया र सहकारीकर्मीको ढुकढुकी बन्न सफल भएकोमा हामी गर्व गछौँ । यो सबै सफलता यहाँहरुजस्तै प्रबुद्ध पाठक वर्गकै कारण सम्भव भएको हो । यो सफलतासँगै चुनौती पनि छन् । आजसम्मको सफलतालाई थप मजबुत र विश्वासिलो बनाइरहनु हाम्रो कर्तव्य र धर्म हुनेछ ।

नेपालको सहकारी अभियानमा सञ्चारमाध्यमको तर्फबाट एक अभियन्ताका रुपमा सहकारीखबर डटकम उभिएको छ । नेपालको सहकारी आन्दोलनलाई द्रुत गतिमा अगाडि बढाउन सञ्चार क्षेत्रको भूमिका अब निर्णायक भइसकेको छ । यस कुरालाई मनन गरेर हामीले सहकारी क्षेत्रका सफलताका कथा र यसभित्रका अनियमितता, समस्यालाई मात्र उजागर गरेका छैनौं, सहकारीमा आउनसक्ने सम्भावित संकटका विषयमा समेत सजग गराउने प्रयास गरेका छौं ।

यो यात्रा सहज बनाउन हामी एक्लैको प्रयास कदापि प्रयाप्त थिएन र हुने छैन । हाम्रो सुरुवात कम सकसपूर्ण रहेन र आजका दिनमा पनि व्यावसायिक पत्रकारिताको धर्म निर्वाह गर्न र दिगोपनाका निम्ति चुनौतीहरुका चाङ छन् । त्यसमाथि कोभिडले पत्रकारितालाई पनि अप्रभावित बनाउन सकेन । हामीले यस अवधिमा धेरै संघर्ष, चुनौती, व्यवधानसँगै हौसला र अनुपम अनुभव संगालेका छौं । हामी अझै परिपक्व भएको दाबी गर्दैनौं, सत्य यत्ति हो कि सहकारीको क्षेत्रमा हामी पहिलो सन्तानका रूपमा स्थापित हुन सकेका छौं । र, यो अवसरमा हामीले पाएको स्थानलाई अझै उचाइँमा पुर्याउने दृढता समेत व्यक्त गर्दछौं ।

आमपाठकलाई सुसूचित गराउने मूल दायित्वबाट हामी कहिल्यै बिमुख हुने छैनौं । सहकारीखबरले विगतमा निष्पक्ष कभरेजको आमरूपमा जुन प्रशंसा पाएको छ, त्यसले हामीलाई जिम्मेवारपूर्ण र व्यवसायिक भएर अघि बढ्न थप ऊर्जा दिएको छ ।

सहकारी क्षेत्रलाई संस्थागत गर्न सहकारीकर्मीलाई घचघच्याउनुका साथै सहकारी क्षेत्रका विकृतिलाई निरुत्साहित गर्न हामी कटिवद्ध छौं । यति भनिरहँदा सहकारी मूल्य र मान्यताका पक्षमा हाम्रो पहरेदारी अझ बलियो गरी हुने प्रण पनि यही अवसरमा पुनः दोहोर्याउन चाहन्छौं ।

अन्त्यमा, सहकारीखबर डटकम ९औं वर्ष प्रवेशको यो खुसीमा विशेषतः हाम्रो आरम्भका सहयात्री लगायत सबै शुभेच्छुक, सहयोगी हात र हौसलाप्रति आभार प्रकट गर्न चाहन्छ । विशेषगरी श्रद्धेय पाठक, सिर्जनशील पत्रकार, लगनशील कर्मचारी, सहयोगी सहकारी संघ संस्था, विज्ञापनदाता र एजेन्सीलगायतमा हामी कृतज्ञ छौं । आशा छ, यहाँहरुको सहयोग विगतमाझैँ निरन्तर हुनेछ ।

यसैबीच, २०१३ साल चैत २० गते बाट सुरु भएको नेपालको सहकारी आन्दोलन ६४ औं वर्ष प्रवेश गरेको अवसरमा सम्पूर्ण सहकारीकर्मीमा हार्दिक शुभकामना समेत दिन चाहन्छौं ।

जय सहकारी !

सम्पादक, काजी श्रेष्ठ

अभिलेख

लोकप्रिय