४ जेष्ठ २०७८, मंगलवार

‘३० हजार सहकारी छन्, अझै किन ४०% व्याजमा ऋण लिएर युवा विदेश जान्छन् ?’ : प्रदेश प्रमुख डा. अहिराज

३ बैशाख २०७८, शुक्रबार
‘३० हजार सहकारी छन्, अझै किन ४०% व्याजमा ऋण लिएर युवा विदेश जान्छन् ?’ : प्रदेश प्रमुख डा. अहिराज

काठमाडौं : प्रदेश नं. २ का प्रदेश प्रमुख डा. राजेश अहिराजले नेपालमा ‘एक गाउँ एक सहकारी’ अवधारण आवश्यक रहेको बताउनुभएको छ । विशेष गरी प्रदेश नं. २ का गाउँहरुमा सहकारी संस्थाहरु आवश्यक रहेको बताउनुभयो । गाउँ गाउँमा सहकारी स्थापना गरी आम नागरिकलाई सहकारीमा समेट्न राष्ट्रिय सहकारी महासंघले नेतृत्व लिन आग्रह गर्नुभयो ।

राष्ट्रिय सहकारी महासंघका पदाधिकारीसँगको भेटमा उहाँले ‘एक गाउँ एक सहकारी’ हुँदा हरेक नेपालीको आयस्तर बढ्ने, सदस्यले गरेको उत्पादनले बजार पाउने र रोजगारी सृजनामा पनि सहयोग पुग्ने उहाँको भनाई थियो ।

देशमा रोजगारीको अभावमा युवाहरु महंगो ब्याजमा ऋण लिएर वैदेशिक रोजगारीमा जाने गरेको स्मरण गराउँदै डा. अहिराजले सहकारी संस्थाहरु गाँउ गाँउमा पुग्न, सदस्यको उत्पादनलाई बजारिकरण गर्न आवश्यक रहेको बताउनुभयो ।

‘देशभर ३० हजारको हाराहारीमा सहकारी संस्था हुने अनी त्यही देशका मानिस ३६, ४० प्रतिशत ब्याजमा ऋण लिएर किन वैदेशिक रोजगारीमा गएका छन् । यो ज्यादै चिन्ताको विषय हो’ उहाँले भन्नुभयो ‘कि तपाईहरु मधेशमा पुग्नु भएको छैन, की तपाईहरुको योजनामा मधेश नै परेको छैन, मधेशका युवाहरु आफ्नो खेत खन्न छोडेर चर्को ब्याजमा ऋण लिएर विदेशमा जानु भएको छ र बाकसमा फर्कनु भएको छ ।’

यो विषय आफूलाई मात्रै नभएर सहकारी महासंघका साथै सहकारी अभियानकै लज्जाको विषय भएको उहाँको भनाई छ । त्यस्ता युवाले सहकारी ऐनले भने अनुसार ब्याज पाउन नसकेर नै चर्को ब्याजमा ऋण लिएर वैदेशिक रोजगारीमा जानु परेको भन्दै यसलाई न्यूनिकरण गर्न अब एक गाँउ एक सहकारीलाई अभियानकै रुपमा अघि बढाउनु डा. अहिराजको भनाई छ ।

यसरी अघि बढ्न सकेको खण्डमा युवाहरु विदेश जान छोड्ने र आफ्नै खेत खन्न थाल्ने उहाँको दाबी छ । उहाँले महासंघले गर्ने हरेक कार्यक्रममा मधेशलाई समावेश गरेर अघि बढ्न सुझाव समेत दिनुभयो ।

अहिले सहकारी संस्थाहरुले जिल्लामा शाखा कार्यालय खोल्दा जहाँ बजार छ त्यहाँ मात्रै खाल्नेहुँदा वास्तविक जनताको पहुँचमा सहकारी संस्था पुग्न नसकेको बताउनुभयो । पहिलादेखि नै बैंक तथा वित्तीय संस्था भएको ठाँउमा सहकारी संस्था खोल्दा धेरै अर्थ नहुने भन्दै वास्तविक जनताको पहुँचमा जाने हो भने गाउँ गाउँमा सहकारी संस्था खोल्न आवश्यक रहेको बताउनुभयो । उहाँले सहकारीको विषयमा गाउँ गाउँमा जनचेतना पनि आवश्यक रहेको बताउनुभयो ।

कार्यक्रममा महासंघका अध्यक्ष मिनराज कंडेलले प्रदेश २ मा अझै पनि सहकारी ऐन, नियम नबनेको स्मरण गराउनुभयो । उक्त प्रदेशमा ऐन, नियमन नभएका कारण महासंघले संघ मार्फत गर्ने काम अघि बढाउन समस्या भएको भन्दै ऐन निर्माणलाई प्राथमिकतामा राख्न आग्रह गर्नुभयो । अहिले प्रदेश २ मा धेरै संघ निष्कृय रहेको पनि अध्यक्ष कंडेलले स्मरण गराउनु भयो । एक गाँउ एक सहकारी नीति प्रभावकारी भएको भन्दै यसलाई अघि बढाउन महासंघले सकारात्मक भूमिका खेल्ने बताउनुभयो ।

प्रदेश प्रमुख कार्यालयका सचिव धुर्ब गैडाले ऐन, कानून निर्माणमा समन्वय र सहजिकरण गर्ने प्रतिबद्धता जनाउनु भएको छ । प्रदेश सरकारले आगामी आर्थिक वर्ष २०७८०७९ को नीति तथा कार्यक्रममा राख्नुपर्ने विषयको जानकारी गराउन आग्रह गर्नुभयो । उहाँले सहकारीसँग सम्बद्ध विषयलाई आगामी आवको नीति तथा कार्यक्रममा समावेश गर्न पहल गर्ने प्रतिबद्धता जनाउनु भयो ।

अभिलेख

लोकप्रिय