६ चैत्र २०८०, मंगलवार

‘सहकारी अभियानको सही बाटो महासम्मेलनले पहिल्याउनु पर्छ’

१७ चैत्र २०७९, शुक्रबार
‘सहकारी अभियानको सही बाटो महासम्मेलनले पहिल्याउनु पर्छ’

ज्ञानु पौडेल
अध्यक्ष, जनउत्थान बचत तथा ऋण सहकारी संस्था, रुपन्देही

तेश्रो राष्ट्रिय महासम्मेलनमा सहभागी हुन जनउत्थान बचत तथा ऋण सहकारी संस्थाको तर्फबाट नाम दर्ता गराएको छु । महासम्मेलनमा सहभागी हुनुको मुख्य उद्देश्य भनेको सिकाई आदान प्रदान नै हो । अहिले सिंगो वित्तीय क्षेत्र नै संक्रमणको अवस्थामा छ । त्यसको असर सहकारीमा पनि देखिन थालेको छ । संकटलाई समाधान गर्ने उपायहरु पनि छलफल तथा संवादबाट आउँछ भन्ने मैले पूर्ण रुपमा विश्वास लिएको छु । सिकाई सहभागि हुने संस्थाहरुका लागि लाभदायी हुने मेरो बुझाई छ ।

संस्थालाई सुरक्षित एवं व्यवस्थित रुपमा सञ्चालन गर्न सञ्चालक र व्यवस्थापनको भूमिका महत्वपूर्ण रहन्छ । त्यसका लागि सिकाई निरन्तर चाहिन्छ । महासम्मेलनमा जाने भनेको एक किसिमको लगानी हो । त्यसको प्रतिफल भनेको संस्थालाई सुरक्षित र व्यवस्थित रुपमा अगाडि बढाउने नै हो । जनउत्थान साकोस जुन ठाउँमा छ, वित्तीय मन्दीको अवस्थामा पनि कुनै समस्या छैन । तरलता व्यवस्थापन गरेका छौं । समुदायमा आधारित भएर कारोबार गरेका र नीति, विधि अनुसार चलेका सहकारीमा तरलता समस्या छैन । आफूसँग भएको अनुभव पनि शेयरिङ गर्न पाइन्छ । अरुहरुबाट पनि सिक्न पाइने भएकाले महासम्मेलन फलदायी हुने मेरो अपेक्षा छ ।

नेपालको सहकारी क्षेत्रमा थुप्रै असल अभ्यासहरु भएका छन् । सहकारीहरुले महिला सशक्तिकरण, आर्थिक तथा समाज रुपान्तरणमा धेरै काम गरेका छन् । नेतृत्व तहमा महिलाको अर्थपूर्ण सहभागिता के छ? भन्ने विषयमा थाहा गर्ने मेरो उद्देश्य छ । तथ्यांक अनुसार पुरुषको तुलनामा सहकारीमा महिला सहभागिता बढी छ । महिलाहरुको आर्थिक उन्नति र नेतृत्व विकासमा कस्तो भूमिका खेल्न सकिन्छ भन्ने एउटा सत्र महासम्मेलनमा रहेको छ । प्यानल डिस्कसनको टपिक्सहरु मैले हेरेँ । धेरै विषयवस्तु हामीलाई काम लाग्ने खालका छन् । अर्कोतर्फ सिकाई कहिल्यै पनि पूर्ण हुन सक्दैन । सिकाईलाई सधैंभरि खुल्ला राख्नुपर्छ । महासम्मेलनमा नेपालमा काम गरिरहेका सहकारीकर्मीहरुले एकअर्काको अनुभव साटासाट गर्न सक्छन् भने विज्ञहरुबाट पनि राम्रो कार्यपत्र प्रस्तुत हुनसक्छ ।

सकारात्मक रुपमा लिइयो भने यस्ता सम्मेलनहरु आवश्यक छन् । यसले हाम्रो क्षमता अभिवृद्धि गर्छ भने विज्ञहरुको अनुभव सुन्न पाइन्छ । त्यो कुरालाई आफ्नो संस्थामा लागु गर्न सकियो भने त्यसले संस्थालाई राम्रो बनाउन सहयोग गर्छ । असल अभ्यास सिकेर आफ्नो संस्थालाई कसरी बलियो बनाउने र जोखिमलाई कसरी न्यूनिकरण गर्दै जाने भन्नेमा टेवा मिल्छ । राष्ट्रिय अन्तर्राष्ट्रिय विज्ञहरुको छलफल तथा सम्वादबाट नेतृत्व विकासमा सघाउ पुग्छ । त्यसैले यस्ता फोरमहरु सहकारी क्षेत्रको लागि आवश्यक छ । सहभागि हुने तर फोरमलाई सिकाइको रुपमा लिइएन भने त्यसले कुनै अर्थ राख्दैन । यस्ता फोरमबाट केहि कुरा सिक्नुपर्छ र अरुहरुलाई पनि सिकाउन पर्छ भन्ने सोच विकास गरियो भने पक्कैपनि फलदायी हुन्छ । महासम्मेलनमा सहभागि हुने तर सिक्नको लागि ध्यान नदिने हो भने त्यसले केहि उपलब्धी दिँदैन । विज्ञहरुबाट आएका सल्लाह सुझाव र निचोडलाई आफ्नो संस्थामा ल्याएर प्रयोग गर्यो भने संस्थालाई अझ उचाइमा पुर्याउन मदत मिल्छ ।

अहिलेको अवस्थामा संस्थालाई कसरी सुरक्षित राख्ने र सहकारीप्रति देखिएको नकारात्मकतालाई चिर्ने काम महासम्मेलनले गर्न सक्नुर्पछ । सबै सहकारी राम्रा छैनन् र समाजको लागि केहि गरेका छैनन् भन्ने कुरालाई चिरेर सहकारीमार्फत राम्रा काम पनि भएका छन् भन्ने कुरालाई महासम्मेलनले स्थापित गर्नुपर्छ । सहकारी अभियानको सहि बाटो महासम्मेलनले पहिल्याउनु पर्छ । अहिलेसम्मको उपलब्धीको समिक्षा गर्दै आगामी बाटो पहिल्याउन सकेमात्र महासम्मेलन उपलब्धीमूलक बन्नेछ । अहिलेको वर्तमान समस्यको विषयमा पछि व्यापक छलफल जरुरी छ ।

सहकारीप्रति साझा बुझाई गराउने थलोको रुपमा यसलाई विकास गर्न सकियो भने महासम्मेलन सफल हुन्छ । सहभागिता बढाउने र भाषणमा मात्रै सीमित गरियो भने त्यति अर्थपूर्ण हुँदैन । त्यसकारण यस्ता फोरमहरु चाहिन्छ तर विषयवस्तु छनौटमा भने आयोजकले ध्यान पुर्याउनुपर्छ ।

(पौडेलसँग गरिएको कुराकानीमा आधारित)

अभिलेख

लोकप्रिय