किसान साकोसले ८.८८ प्रतिशतमै लगानी गर्ने, १ वर्षसम्म स्थिर ब्याजदर

काठमाडौं : किसान बचत तथा ऋण सहकारी संस्थाले सदस्यहरुलाई वार्षिक ८.८८ प्रतिशत ब्याजदरमा कर्जा प्रवाह गर्ने भएको छ । संस्थाले ‘किसान स्मार्ट उद्यमी ऋण’ मार्फत सदस्यलाई ५० लाख रुपैयाँसम्म लगानी गर्ने भएको हाे ।

कर्जाको अविधि १० वर्षसम्म रहने र एक वर्षसम्म ब्याजदर घटबढ नहुने संस्थाले जनाएको छ । उत्पादन, प्रशोधन, प्याकेजिङसँग सम्बन्धीत उद्यमलाई मात्रै कर्जा प्रवाह गरिने संस्थाका प्रमुख कार्यकारी अधिकृत सञ्जयराज तिमिल्सिनाले जानकारी दिए । संस्थासँग २३ प्रतिशतभन्दा बढी तरलता रहेको र तरलता व्यवस्थापन गर्नको लागि कर्जाको नयाँ प्रडक्ट डिजाईन गरिएको उनले बताए ।

२०८१ मंसिर मसान्तसम्म संस्थाको सेयर पुँजी ३५ करोड १३ लाख ७७ हजार ८ सय रहेको छ । संस्थाको जगेडा कोषमा २० करोड ९९ लाख, अन्य कोषमा ४ करोड ४९ लाख रहेको छ ।

संस्थाको संस्थागत पुँजी २३ करोड २६ लाख रहेको छ । कुल बचत ३ अर्ब १६ करोड ७५ लाख, लगानी २ अर्ब ४५ करोड ९५ लाख रहेको छ ।

संस्थामा ९२ हजार ६० जना सदस्य आवद्ध छन् भने १० हजार १३५ जनाले कर्जा उपभोग गरेका छन् । संस्थाको कुल सम्पत्ति ३ अर्ब ९० करोड ५१ लाख रहेको छ ।