१५ प्रतिशत वित्तीय क्षेत्र ओगटेको सहकारी समस्यामुक्त हुनुपर्नेमा गभर्नरको जोड ( फोटो फिचर र भिडियो सहित)

सहकारी खबर

५ पुष २०७०, शुक्रबार

काठमाडौं  ५ पुस। नेपाल राष्ट्र बैंकका गभर्नर डा. युवराज खतिवडाले देशको १५ प्रतिशत वित्तीय क्षेत्र ओगटेको सहकारी समस्यामुक्त हुनुपर्नेमा जोड दिनुभएको छ । नेपाल बचत तथा ऋण केन्द्रीय सहकारी (नेफस्कून) को २२ औं साधारणसभामा बोल्दै उहाँले सहकारीमा रहेका कमजोरी लुकाउन हैन, फुकाउन आग्रह गर्नुभयो ।

गभर्नर खतिवडाले सहकारीले आफूलाई उत्पादनमुखी विकासमा उत्प्रेरित गर्न सके रोजगारीको विकास हुने र त्यसबाट सशक्तिकरणको अभियान प्रारम्भ हुने बताउनुभयो । सरकार र निजीक्षेत्रको प्रयासबाट मात्र जनस्तरमा वित्तीय पहुँच पुग्न सम्भव नभएकाले सहकारीको अवधारणा आएको स्पष्ट पार्दै उहाँले सहकारीका सकारात्मक प्रयासमा सहजकर्ताको भूमिका निभाउन सरकार तयार रहेको बताउनुभयो ।

सभाको उद्घाटन गर्दै अर्थमन्त्री शंकरप्रसाद कोइरालाले मुलुकमा राजनीतिक र संवैधानिक संक्रमणको व्यवस्थापन भएको अवस्थामा अब विकासको साझा कार्यसूची बनाएर अघि बढ्नुपर्ने बताउनुभएको छ । सियोदेखि हेलिकोप्टरसम्म बाहिरबाट ल्याउनुपर्ने मुलुकको आयातमुखी अर्थतन्त्रलाई उत्पादनमुखी नबनाएसम्म सबै प्रयास निष्फल हुने बताउनुभयो ।

उहाँले आफूले सहकारीलाई सरकारी र निजीक्षेत्रको सेतूका रुपमा विश्वास गरेको बताउँदै यस वर्षको बजेटले यी तीन खम्बाबीच सहकार्य, समदूरी र समन्वयको बाटो खोलेकोे बताउनुभयो । सहकारी क्षेत्रमा संख्यात्मक नभई गुणात्मक प्रगति हुनुपर्ने बताउँदै उहाँले यसक्षेत्रमा सरकारको हस्तक्षेप कमभन्दा कम होस् भन्ने चाहेकोले आत्मअनुशासनलाई मूलमन्त्र बनाई अघि बढ्न सहकारीकर्मीहरुलाई आग्रह गर्नुभयो ।

अर्थ मन्त्रालयले केन्द्रीय वित्तीय रणनीति तयार गर्दै गरेको जानकारी दिँदै मन्त्री कोइरालाले सहकारीलाई पनि त्यसले सकारात्मक सम्बोधन गर्ने बताउनुभयो । सहकारी विभागका रजिष्टार केदार न्यौपानेले एकातिर कामदार नपाउने, अर्कातिर काम नपाउने सामाजिक अवस्थालाई ध्यान दिएर सहकारीले आफ्ना गतिविधि सञ्चालन गर्नुपर्ने बताउनुभयो ।

उहाँले नेपालमा सहकारीले २ खर्बभन्दा बढी कारोवार गरिरहेको जानकारी दिँदै यो पैसा हाईड्रोपावरका क्षेत्रमा लगानी गर्न सुझाव दिनुभयो ।पूर्वमन्त्रीहरु राजेन्द्रप्रसाद पाण्डे, केशव बडाल र दीपकप्रकाश बाँस्कोटाले सहकारी क्षेत्रले देशको सामाजिक र आर्थिक विकासमा ल्याएको परिवर्तनका विषयमा बोल्नुभएको थियो ।