काठमाडौं । दक्षिण एसियाली क्षेत्रीय सहयोग सङ्गठन (सार्क)को १८ औँ शिखर सम्मेलनका लागि आवश्यक ट्राफिक व्यवस्थापनको सम्पूर्ण तयारी पूरा भएको महानगरिय ट्राफिक प्रहरी महाशाखाले जनाएको छ ।

महाशाखाले शुक्रबार आयोजना गरेको पत्रकार सम्मेलनमा महाशाखा प्रमुख प्रहरी नायब महानिरीक्षक केशव अधिकारीले मङ्सिर ८ गतेदेखि १२ गतेसम्म उपत्यकामा सवारीसाधन संचालनमा जोरविजोर नम्बर प्रणाली लागू गरिने जानकारी दिए ।

जोर विजोर प्रणालीअनुसार मङ्सिर ८, १० र १२ गते जोर नम्बर प्लेट र मङ्सिर ९ र ११ गते विजोर नम्बर प्लेटका सवारी साधनमात्रै गुड्न पाउनेछन् । सो प्रणाली लागु भएपश्चात जोर विजोर प्रणाली मिच्ने गरी सवारी साधन चलाए कारबाही गरिने महाशाखाले जनाएको छ ।

मङ्सिर ८ गते सो प्रणाली उल्लङ्घन गर्नेलाई जुनबाटो आएको हो त्यही बाटो फर्काइदिने र ९ गतेदेखि नियम उल्लङ्घन गर्नेको सवारी साधन नियन्त्रणमा लिनुका साथै जरिवाना पनि गरिने छ ।

आकस्मिक सेवाका सवारी साधन (अस्पताल, एम्बुलेन्स, दमकल, शववाहन), विवाहका सवारी साधन र हरियो नम्बर प्लेटका पर्यटक सवारीसाधनमा भने जोरविजोर प्रणाली लागू हुने छैन । “अत्यावश्यक सेवाका सवारीसाधन (ग्यास, दूध, पानी, तरकारी, पेट्रोलियम पदार्थ आदि) उपत्यकाबाट बाहिरका लागि चल्ने सवारीसाधन, रात्रि बस र दिवा सेवाका यात्रुवाहक सवारीसाधनलाई सीमित मात्रामा जोरविजोर प्रणाली लागू गरिनेछ ।’ नायब महानिरीक्षक अधिकारीले भने । ती सवारी साधनलाई बिहान ५ बजे अगावै आफ्नो गन्तव्यतर्फ लाग्न आग्रह गरिने तथा विशिष्ट पाहुनाको रुटका आधारमा नियन्त्रित रुपमा समय मिलाएर चल्न दिइनेछ । सरकारी सवारी साधनको हकमा गृह मन्त्रालयको पासको आधारमा र कूटनीतिक नियोगले सुरक्षा पासका आधारमा, सञ्चारमाध्यमले सञ्चारमाध्यम उपसमितिको पासका आधारमा जोरविजोर प्रणाली लागू नगरिने महाशाखाले जनाएको छ ।

सम्मेलनस्थल राष्ट्रिय सभागृह नजिकै रहेको पुरानो बसपार्क मङ्सिर ८ गतेदेखि नै खाली गरिने छ । त्यहाँ पार्किङ गरिने सवारी साधनका लागि रुटअनुसार सानो–गौचरन, लैनचौर, जडीबुटी, त्रिवि गेट कीर्तिपुरनजिकै र ढुङ्गेअड्डामा पार्किङ्को व्यवस्था मिलाइएको ट्राफिक प्रहरीले जनाएको छ ।

सम्पूर्ण सवारी मार्ग, वैकल्पिक मार्ग, समारोहस्थल, पार्किङलगायत व्यवस्थापन योजना, ट्राफिक परिचालनको योजना, सार्कमा खटिने सम्पूर्ण ट्राफिक प्रहरीलाई अनुशिक्षण दिइएको प्रमुख अधिकारीले बताए । उपत्यकामा मङ्सिर ९ देखि १२ गतेसम्म शैक्षिक संस्था बिदा र मङ्सिर १० र ११ गते सार्वजनिक बिदा दिइएकोले पनि ट्राफिक व्यवस्थापनमा सहज हुने आशा गरिएको छ ।